اتىراۋدا تانىمال دەپۋتاتتىڭ باسى داۋعا قالدى

استانا. قازاقپارات - اتىراۋدا وبلىستىق ءماسليحاتتىڭ دەپۋتاتى ءارى «اتىراۋ» الەۋمەتتىك كاسىپكەرلىك كورپوراتسياسىنىڭ بۇرىنعى باسشىسى ابات تاسىموۆ ءۇي قاماققا الىندى.

وعان قىزمەت بابىن اسىرا پايدالاندى دەگەن ايىپ تاعىلىپ وتىر دەپ حابارلايدى «ك ت ك» ارناسى.

ناقتىراق ايتقاندا، ابات تاسىموۆ تىگىن سەحى مەن ەت پاۆيلونىن اشۋ ءۇشىن ميلليوندار سۇراپ الدىنا كەلگەن كاسىپكەرلەرگە جالپاق شەشەيلىك تانىتىپتى. ياعني ولاردىڭ قولىندا قارجىنى قايتارۋعا قاجەتتى كەپىلدىكتىڭ جوق ەكەنىن بىلە تۇرا، قۇجاتتارعا قول قويا بەرگەن.

وسىلايشا 50 ميلليون تەڭگەگە جۋىق قاراجات سۇراۋسىز كەتە بارعان. بۇدان وزگە تاسىموۆتىڭ ورىنباسارى جانمۇرات ەسجانوۆ تا وسىنىڭ الدىندا ءىستى بولعان ەدى. ول وبلىستىڭ تۇراقتاندىرۋ قورىنا 15 توننا جارامسىز قۇس ەتىن الۋ ءۇشىن 8 جارىم ميلليون تەڭگەنى جەلگە شاشقان.

ءبىراق ەسجانوۆ وتكەن ايدا سوت شەشىمىمەن 1 جارىم ميلليون تەڭگەگە جۋىق ايىپپۇل تولەپ، قۇتىلىپ كەتتى. ال، قازىر كورپوراتسيانىڭ وسى ىسكە قاتىسى بار دەگەن تاعى ءبىر توپ قىزمەتكەرىنىڭ دە باسىنا بۇلت ءۇيىرىلىپ، تەرگەلىپ جاتىر.