استانالىق ستۋدەنت سۋ ۇنەمدەيتىن وزىق تەحنولوگيا ويلاپ شىعاردى

بۇگىن استانادا حاكاتون - ونەرتاپقىشتاردىڭ فورۋمى باستالدى. زاماننىڭ وزىق ويلى جاستارىنىڭ سايىسى 2 كۇنگە سوزىلماق. وعان قاتىسۋشىلارعا 48 ساعاتتىڭ ىشىندە قالانىڭ الەۋمەتتىك ماسەلەلەرىن شەشۋ تاپسىرماسى جۇكتەلگەن.
توپ-توپ بولىپ بولىنگەن قاتىسۋشىلارعا اتاپ ايتقاندا، كۇندەلىكتى تۇتىناتىن سۋدى ۇنەمدەۋ، قوقىستاردى ءبولۋ ارقىلى ولاردى وڭدەپ پايداعا جاراتۋ، قۇرىلىس ماتەريالدارى نارىعىنداعى جۇمىستاردى جەڭىلدەتۋ سەكىلدى نوۋ-حاۋ ويلاستىرىپ شىعارۋ تاپسىرماسى بەرىلگەن.
فورۋمعا استانالىق 17 جاستاعى ستۋدەنت قۋانىش وزبەكوۆ تە قاتىسۋدا. ول «Toilet Tank bank» جوباسىن اكەلگەن.
ايتۋىنشا، اتالعان جوبا ارقىلى استانادا جىلىنا ميللياردتاعان ليتر سۋدى ۇنەمدەۋگە بولادى.
«مەنىڭ يدەياما استانا قالاسىنداعى سۋدى ۇنەمدەۋگە باعىتتالعان. بۇل جوبا ەڭ الدىمەن دارەتحاناداعى سۋدى ۇنەمدەۋگە ارنالادى. سەبەبى، ءبىزدىڭ ەسەپتەۋىمىز بويىنشا ۇيدەگى سۋدى ەڭ كوپ تۇتىناتىن ورىن اجەتحانا بولىپ وتىر. ماسەلەن، ءبىر رەتتىك سۋدى اعىزعاندا 6-7 ليتر سۋ كەتەدى. ال شىن مانىندە وعان 4-5 ليتر سۋ قاجەت. ال قالعان 2 ليتر دالاعا كەتىپ جاتىر. 2 ليتر سۋدىڭ مولشەرى از بولىپ كورىنۋى مۇمكىن، ءبىراق حالقى1 ميلليونعا جەتكەن استاناداعى ءار ۇيدەن 2 ليتر سۋ ارتىق كەتىپ جاتسا، بۇنىڭ ءوزى قانشاما شىعىن ەكەنىن ەسەپتەي بەرىڭىز. كۇنىنە ادام اجەتحاناعا 3-4 رەت بارادى. وسىنى ەسكەرسەڭىز، كۇنىنە ميلليونداعان ليتر سۋ تەككە كەتىپ جاتىر. ەگەر دە وسى تەحنولوگيانى ەنگىزسەك، حالىقتىڭ جانە مەملەكەتتىڭ اقشاسى ۇنەمدەلەر ەدى. دارەتحانانىڭ سۋ ساقتالاتىن قۇرىلعىنىڭ ىشىنە قويىلاتىن شاعىن قاپتىڭ باعاسى بار-جوعى 260 تەڭگە. دەمەك، تەحنولوگيا نەبارى 1 ايدا ءوزىن-ءوزى اقتايدى»، - دەيدى ستۋدەنت.
قۋانىشتىڭ ايتۋىنشا، اتالعان جوباعا قىتايلىق كومپانيا قىزىعۋشىلىق تانىتىپ وتىر ەكەن. قازىرگى تاڭدا بۇل تەحنولوگيانىڭ انالوگى ا ق ش پەن يزرايل ەلدەرىندە قولدانىلادى. «سولاردىڭ تاجىريبەسىنە سۇيەنىپ، ا ق ش- تاعى ارىپتەستەرمەن سويلەستىم. ولار دا مەن سەكىلدى جاس جىگىتتەر. پاتەنت الۋ جاعىنان كەلىسپەۋشىلىك بولمايدى. كەلەسى ايدا پاتەنتتى الايىن دەپ جاتىرمىن. استانا قالاسىنىڭ اكىمدىگىنە بۇل يدەيا ۇناپ وتىر. قالا حالقىنىڭ سانى جىل ساناپ ءوسىپ جاتقاندىقتان، سۋدى ۇنەمدەۋ ماسەلەسى وزەكتى دەگەن ويدامىن»، - دەيدى قۋانىش وزبەكوۆ.