ءتول كۇرەسىمىزدى وليمپيادا ويىندارىنا ەنگىزۋگە بار كۇشىمىزدى سالىپ جاتىرمىز - سەرىك توكەيەۆ
بۇل تۋرالى اشحاباد قالاسىندا ءوتىپ جاتقان جابىق كەشەندەگى ازيا ويىندارىندا جۋرناليستەرگە سۇحبات بەرگەن دۇنيەجۇزىلىك قازاق كۇرەسى فەدەراتسياسىنىڭ ءبىرىنشى ۆيتسە-پرەزيدەنتى سەرىك توكەيەۆ ءمالىم ەتتى.
«مىنە، قازاق كۇرەسى تۇڭعىش رەت جابىق كەشەندەگى ازيا ويىندارىنىڭ باعدارلاماسىنا ەنىپ، بالۋاندارىمىز ەكى التىن مەدال جەڭىپ الدى. بۇل قازاق ەلىنىڭ جەڭىسى. بۇل قازاق سپورتىنىڭ جارقىن جەتىستىگىنىڭ ايناسى. بۇل دۇنيەجۇزىلىك قازاق كۇرەسى فەدەراتسياسىنىڭ ۇزاق جىل جاساعان ەڭبەگىنىڭ ارقاسىندا قول جەتكىزگەن تابىسى. ەندى، كەلەسى جىلى جازعى ازيا ويىندارى وتەدى. بۇيىرسا قازاق كۇرەسىن سول «سارىقۇرلىق» دوداسىنان دا كورۋلەرىڭىز مۇمكىن. ۇلتتىق كۇرەسىمىز جازعى ازيا ويىندارىنىڭ باعدارلاماسىنا ەنسە، ارى قاراي 2020-جىلى وليمپيادا ويىندارىنان كورىنۋىمىز ابدەن مۇمكىن. قازىر ءتول سپورتىمىزدى ءتورت جىلدىق وليمپيادا ويىندارىنىڭ باعدارلاماسىنا ەنگىزۋ تۋرالى ۇسىنىستار جاساپ، قولىمىزدان كەلگەنشە تىرىسىپ جاتىرمىز»، - دەدى سەرىك توكەيەۆ.
ەستەرىڭىزگە سالا كەتەيىك، ءتول كۇرەسىمىزدى وسى جارىسقا قوسۋ ماسەلەسى وتكەن جىلى تۇركيانىڭ ىستانبۇل قالاسىندا كۇرەس تۇرلەرى جونىندە وتكەن فورۋمدا شەشىلگەن بولاتىن.
ال بيىل بۇكىل الەمدىك كۇرەس وداعىنىڭ (United World Wrestling) پرەزيدەنتى نەناد لالوۆيچ پەن ازيا وليمپيادا كەڭەسىنىڭ پرەزيدەنتى شەيح احمەد ءال-فاحاد ءال-احمەت ءال-ساباح ۇلتتىق كۇرەسىمىزدى 2017-جىلعى ازيا ويىندارىنىڭ باعدارلاماسىنا ەنگىزۋ كەلىسىمىنە قول قويدى.
اۆتور: كۇنسۇلتان وتارباي
