ءتورت ەلدىڭ كۇش قۇرىلىمدارى استانادا قويان-قولتىق ۇرىسقا ءتۇستى

استانا. قازاقپارات - استانا قالاسىندا قازاقستان رەسپۋبليكاسى ۇلتتىق ۇلانى باس قولباسشىسىنىڭ كۋبوگى ءۇشىن قويان-قولتىق ۇرىستان حالىقارالىق ءتۋرنيردىڭ اقتىق سايىستارى ءوتتى، دەپ حابارلايدى قازاقپارات.

جارىسقا قازاقستاننىڭ كۇش قۇرىلىمدارىنىڭ سپورت كوماندالارىنان بولەك، رەسەي فەدەراتسياسى ۇلتتىق گۆاردياسىنىڭ اسكەرلەرى، قىتاي حالىق رەسپۋبليكاسىنىڭ حالىقتىق قارۋلى پوليتسياسى، قىرعىزستان رەسپۋبليكاسى ۇلتتىق ۇلانىنىڭ سپورت كوماندالارى قاتىستى.

بارلىعى 150 گە جۋىق سپورتشىدان تۇراتىن 15 كوماندا باق سىنادى. تۋرنير ەكى كۇنگە جالعاستى. ق ر ۇلتتىق ۇلانىنىڭ باسپا ءسوز قىزمەتىنەن ءمالىم ەتكەندەي، توتاميدەگى قىزۋ تارتىستا 9 سالماق دارەجەسى بويىنشا جەڭىمپازدار انىقتالدى.

55 كەلى سالماقتا ق ر ۇ ق ك كومانداسىنىڭ وكىلى ەرعالي ناحانوۆ، 60 كەلى سالماقتا ءبىرىنشى ورىندى ق ر ۇلتتىق ۇلان جاۋىنگەرى باۋىرجان سۇلتانوۆ جەڭىپ السا، 65 كەلىدە قىتايلىق سپورتشىمەن تەڭ ۇرىستا «دينامو» سپورت كلۋبىنىڭ سپورتشىسى شىڭعىس جانعازى جەڭىستى قولدان بەرگەن جوق.

70 كەلىدە ۇ ق ك سپورتشىسى نازاربەك زابيەۆ جەڭىسكە جەتتى. سونداي-اق، ۇ ق ك تاعى ءبىر وكىلى بەكزات بەكتەمىسوۆ 75 كەلىدە قارسىلاس شىق كەلتىرمەدى. 80 كەلى سالماقتا مەملەكەتتىك كۇزەت قىزمەتىنىڭ جاۋىنگەرى نۇرسۇلتان بەكباتشايەۆ ءبىرىنشى ورىندى يەلەندى.

85, 90 جانە 90 كەلىدەن استام سالماق دارەجەلەرىندە رەسەي فەدەراتسياسى ۇلتتىق گۆاردياسىنىڭ سپورتشىلارى: رۋسلان گيليازوۆ، رومان كوپىلوۆ جانە ساليمگەرەي راسۋلوۆتاردىڭ مىسى باسىم بولدى. جالپى كوماندالىق ەسەپتە ءبىرىنشى ورىندى ر ف ۇلتتىق گۆاردياسىنىڭ قۇراماسى يەلەندى.

جەڭىمپاز كوماندا ق ر ۇلتتىق ۇلانى باس قولباسشىسىنىڭ كۋبوگىمەن قاتار 500 مىڭ تەڭگە اقشالاي سىيلىق الدى. ەكىنشى ورىن - ق ر ۇلتتىق ۇلانىنىڭ كومانداسىنا بۇيىردى. ۇلاندىقتار ارنايى سەرتيفيكاتپەن قوسا 300 مىڭ تەڭگەنى قانجىعالارىنا بايلادى. ءۇشىنشى ورىنمەن بىرگە 200 مىڭ تەڭگە كولەمىندەگى اقشالاي سىياقىنى ق ر مەملەكەتتىك كۇزەت قىزمەتىنىڭ قۇراماسى مىسە تۇتتى.

ق ر ىشكى ىستەر ءمينيسترى قالمۇحانبەت قاسىموۆ تۋرنيرگە قاتىسۋشىلاردى جەڭىستەرىمەن قۇتتىقتاپ، العىسىن ءبىلدىردى. سونىمەن قاتار، شارا بارىسىندا «ريو-2016» وليمپيادا ويىندارىنىڭ جۇلدەگەرى، بوكسشى ۆاسيلي لەۆيتكە قۇقىقتىق ءتارتىپ اسكەرى جاۋىنگەرلەرىنىڭ اراسىندا بۇقارالىق سپورتتى دامىتۋعا قوسقان ۇلەسى ءۇشىن «قۇقىقتىق ءتارتىپ اسكەرىنە - 25 جىل» كەۋدە بەلگىسىمەن ماراپاتتالدى.

ماراپاتتى ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ تابىس ەتتى.