گۇلىسحان ناحبايەۆا قازاقستاندىق گروسسمەيستەرلەر اراسىندا ۇزدىك اتاندى

شىمكەنت. قازاقپارات - الماتىدا قازاقستان جانە ۋكراينا ەلدەرىنىڭ شاحماتتان ايەلدەر قۇراما كوماندالارى اراسىندا وتكەن جولداستىق كەزدەسۋدە شىمكەنتتىك گروسسمەيستەر گۇلىسحان ناحبايەۆا «ەڭ ۇزدىك ويىنشى» اتاندى.

ق ر شاحمات فەدەراتسياسى ۇيىمداستىرعان جارىستا ءار كوماندادان 5 ويىنشى ءبىر-بىرىمەن 5 كلاسسيكالىق جانە راپيد سايىسىندا باق سىناعان بولاتىن، دەپ حابارلايدى قازاقپارات ح ا ا ءتىلشىسى.

قازاقستان قۇراما كومانداسى ساپىندا ەل نامىسىن گۇلىسحان ناحبايەۆا، جانسايا ابدىمالىك، گۇلميرا داۋلەتوۆا، شولپان جىلقىايداروۆا جانە اسەل سەرىكبايلار قورعادى.

ايتا كەتەيىك، ۋكراينالىقتار FIDE رەيتينگىندە - ءۇشىنشى، قازاقستاندىقتار 21-ورىندا تۇر. ۋكراينا 2013-جىلى كوماندالىق ەسەپتە الەم چەمپيونى اتانعان مىقتى قۇراما. شاحماتشى قىزدارىمىز ازۋلى قارسىلاستارىنا لايىقتى ويىن كورسەتە بىلدى، تەك ءسال ساتتىلىك جەتىسپەدى.

ناتيجەسىندە شاحماتتىڭ كلاسسيكا ءتۇرى بويىنشا 13,5:11,5 جانە راپيد سايىسىندا 14,5:10,5 ەسەبىمەن ۋكراينالىقتار جەڭىسكە جەتتى. قۋانارلىعى، قوس قۇرامانىڭ تارتىسىندا 10 ويىننان 7,5 ۇپاي جيناعان شىمكەنتتىك گۇلىسحان ناحبايەۆا «ەڭ ۇزدىك ويىنشى» اتاندى.

ۋكراينا قۇراماسىندا بۇل اتاق يۋليا وسماكقا بۇيىردى. گۇلىسحان ناحبايەۆا وسىعان دەيىن ازيانىڭ ءۇش دۇركىن چەمپيونى (تاشكەنت 2007، نيۋ دەلي 2009، چەنناي 2010)، ەۋرازيا كۋبوگىنىڭ جەڭىمپازى (الماتى 2016)، بۇكىل الەمدىك وليمپيادادا 4-6- ورىن، ترومسك 2014)، الەم بىرىنشىلىگىندە 4-ورىن (استانا 2013، چەندۋ 2015 )، حالىقارالىق تۋرنيرلەردىڭ جەڭىمپازى (لوندون 2011)، ورتالىق ازيا چەمپيونى (وش 2013)، ۋنيۆەرسيادا چەمپيونى (كيپر 2013)، ازيا بىرىنشىلىگىنىڭ كۇمىس جۇلدەگەرى (يران 2014)، قازاقستان ايەلدەرى اراسىندا بەس دۇركىن چەمپيون اتانعان.

سونداي-اق ماۋسىم ايىندا قىتايدىڭ چەندۋ قالاسىندا وتكەن ازيا بىرىنشىلىگىندە 119 شاحماتشىنىڭ اراسىنان 7 ۇپايمەن 2-ورىندى جەڭىپ العان بولاتىن.