اقتوبەدە كيىك ءمۇيىزىن تاسىمالداعان وزبەكستان ازاماتى ۇستالدى

«براكونەر» الدىن الۋ شاراسى كەزىندە زاڭسىز شايان تاسىمالداۋشىلارعا ايىپپۇل سالىندى، دەپ حابارلايدى قازاقپارات ءتىلشىسى.
اقتوبەدە «براكونەر» الدىن الۋ شاراسى ءوتىپ جاتىر. ءبىر كۇن ىشىندە زاڭسىز بالىق اۋلاپ، اڭ اتقاندار ۇستالدى. اقتوبە وبلىستىق جەرگىلىكتى پوليتسيا قىزمەتى، تابيعاتتى قورعاۋ پوليتسياسى «گاز» اۆتوكولىگىن توقتاتىپ، وزبەكستان ازاماتىنا تيەسىلى سومكەدەن 4 دانا كيىك ءمۇيىزىن تاركىلەدى.
«كيىك ءمۇيىزىن زاڭسىز تاسىمالداۋ دەرەگىنە قاتىستى قىلمىستىق كودەكستىڭ «وسىمدىكتەردىڭ نەمەسە جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن، سونداي-اق پايدالانۋعا تىيىم سالىنعان تۇرلەرىمەن، ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ» بابى بويىنشا ءىس قوزعالدى.
ەگەر كۇدىكتىنىڭ كىناسى دالەلدەنسە، ول ايىپپۇل تولەيدى نەمەسە ءۇش جىلعا دەيىنگى مەرزىمدە باس بوستاندىعىنان ايىرىلادى»، - دەدى اقتوبە وبلىستىق ءى ءى د باسپا ءسوز جەتەكشىسى نۇرگۇل قوناقبايەۆا.
سونىمەن قاتار، اقتوبەدەگى جول-پاترۋلدىك پوليتسياسى روتاسىنىڭ قىزمەتكەرلەرى جول قوزعالىسى ەرەجەسىن بۇزعان «ۆاز-21140» اۆتوكولىگىن توقتاتىپ، 100 كەلى شايان تاركىلەدى. شايان تاسىمالداۋشى ايىپپۇل تولەيدى.