نۇرلان ەرمەكبايەۆ جاستاردى ءدىني فاناتيزمنەن اۋلاق بولۋعا شاقىردى
بۇل تۋرالى اتالعان ۆەدومستۆونىڭ باسپا ءسوز قىزمەتى حابارلادى. قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ بۇگىن اقتاۋ قالاسىندا حالىقارالىق فورۋمعا قاتىسۋدا. سونداي- اق، فورۋم جۇمىسىنا ماڭعىستاۋ وبلىسىنىڭ اكىمى ەرالى توعجانوۆ، ازەربايجان رەسپۋبليكاسى جاستار ءىسى جانە سپورت ءمينيسترىنىڭ ورىنباسارى ينتيگام بابايەۆ، قازاقستان رەسپۋبليكاسى ءبىلىم جانە عىلىم مينيسترلىگىنىڭ جاۋاپتى حاتشىسى ارىن ورساريەۆ، قازاقستان رەسپۋبليكاسىنداعى يران يسلام رەسپۋبليكاسىنىڭ باس كونسۋلى ماحمۋد اديب قاتىستى.
نۇرلان ەرمەكبايەۆ فورۋم قاتىسۋشىلارىنا ارناپ قۇتتىقتاۋ ءسوز سويلەدى. «قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ «تەڭىز جەرلەردى بولگەنىمەن، حالىقتاردى بولە المايدى، كەرىسىنشە ولاردى تابىستىرادى»، - دەپ ايتىپ جۇرەدى. ەلباسىنىڭ بۇل قاناتتى ءسوزى مىڭجىلدىقتار بويى ءبىزدىڭ مەملەكەتتەرىمىز اراسىندا قالىپتاسقان دوستىق قارىم- قاتىناستىڭ ماڭىزدىلىعىن بىلدىرەدى. اقتاۋ قالاسىندا ءوتىپ جاتقان حالىقارالىق فورۋم كاسپيي جاعالاۋىنداعى ەلدەردىڭ جاستارى اراسىندا دوستىق بايلانىستى نىعايتۋعا باعىتتالعان. وسى فورۋم ارقىلى جاستارىمىز ءبىر- بىرىمەن ءوزارا ارىپتەستىك ورناتىپ جانە وزدەرى ەڭبەك ەتىپ جۇرگەن ءار سالا بويىنشا تاجىريبە الماسۋعا مۇمكىندىك الادى»، - دەپ اتاپ ءوتتى مينيستر نۇرلان ەرمەكبايەۆ.
نۇرلان ەرمەكبايەۆ جاستارعا كاسپي جاعالاۋى ەلدەرىنىڭ ارىپتەستىك ماسەلەلەرىن تاقىلاۋ ءۇشىن جۇمىس بابىندا ءجيى كەزدەسۋلەر وتكىزىپ تۇرۋعا ۇسىنىس ءبىلدىرىپ، قازاقستان تاراپىنان ۇنەمى قولداۋ كورسەتىلەتىندىگىن اتاپ ءوتتى. «ەلىمىز قازىرگى ۋاقىتتا «رۋحاني جاڭعىرۋ» باعدارلاماسىن جۇزەگە اسىرۋعا كىرىستى. اتالعان باعدارلامادا پراگماتيزمدى دامىتۋ تۇرعىسىندا زاماناۋي تالاپتاردى ەسكەرە وتىرىپ، ۇلتتىق مادەنيەت پەن تاريحىمىزدى ساقتاپ قالۋ جولىنداعى جۇمىستارعا ەرەكشە دەن قويىلعان. جازۋدى لاتىن قارپىنە كوشىرۋگە دايىندىق جۇرگىزىلۋدە. ىشكى جانە سىرتقى تۋريزمدى دامىتۋ بويىنشا جۇمىستار قولعا الىنباق. وسىلايشا، قازاقستان كاسپيي ماڭى مەملەكەتتەرىنىڭ تابيعي جانە گەوگرافيالىق ارتىقشىلىقتارىن پايدالانۋدىڭ ماڭىزدىلىعىن راستايدى»، - دەدى مينيستر.
نۇرلان ەرمەكبايەۆ ەلدىڭ دامۋ جولىندا جاستاردىڭ ماڭىزدى رولگە يە ەكەندىگىن اتاپ ءوتتى. «جاس ۇرپاقتىڭ ءبىلىمدى، ساۋاتتى بولۋى، ەتنيكالىق جانە ءدىني ايىرماشىلىقتارعا توزىمدىلىك جانە ىزگىلىك تانىتۋى ماڭىزدى. جاستارىمىز ءدىن فاناتتارى مەن ەكسترەميستىك ۇيىمداردان بويلارىن اۋلاق ۇستاۋى ءتيىس. سونداي- اق، جاستاردىڭ ءاربىرى ەشكىمنىڭ قىسىمىنسىز، وزدەرىنىڭ دىنگە جانە ءدىني سەنىمدەرگە دەگەن ءقوزقاراستارىن وينالىپ بارىپ ايقىنداۋلارى قاجەت»، - دەپ اتاپ ايتتى ءدىن ىستەرى جانە ازاماتتىق قوعام ءمينيسترى.
شارا سوڭىندا نۇرلان ەرمەكبايەۆ فورۋم قاتىسۋشىلارىنىڭ جۇمىسىنا تابىس تىلەدى. ايتا كەتەرلىگى، اۋقىمدى شارانى - قازاقستان رەسپۋبليكاسىنىڭ ءدىن ىستەرى جانە ازاماتتىق قوعام مينيسترلىگى، ماڭعىستاۋ وبلىسىنىڭ اكىمدىگى جانە الماتى مەنەدجمەنت ۋنيۆەرسيتەتى ۇيىمداستىرىپ وتىر. فورۋمنىڭ ماقساتى - مادەنيەتارالىق ديالوگتى قالىپتاستىرۋ، جاستار ساياساتى سالاسىنداعى يننوۆاتسيالاردى تانىستىرىپ، ۇزدىك ماماندارمەن تاجىريبە الماستىرۋ، جاستار ۇيىمدارى مەن كاسپي جاعالاۋى ەلدەرى جاستارىنىڭ دوستىق ارىپتەستىگىن نىعايتۋ بولىپ تابىلادى.
