حالىقارالىق «التىن ساقا» انيماتسيالىق فيلمدەر فەستيۆالىنىڭ جەڭىمپازدارى ماراپاتتالدى - فوتو
قىرعىزستان، وزبەكستان، تۇركيا، ازەربايجان، ياكۋتيا، التاي، باشقۇرتستان جانە قازاقستان رەسپۋبليكاسىنىڭ انيماتورلارى قاتىسقان شاراعا پاتريوتتىق رۋحتى كوتەرۋگە ارنالعان 21 فيلم ۇسىنىلعان بولاتىن. قازىلار القاسىنىڭ شەشىمىمەن الماتى قالاسىنىڭ انيماتورى اباي ءابىلدانىڭ «وتتان جارالعاندار» فيلمى باس جۇلدەگە يە بولدى. جۇلدەلى ءبىرىنشى ورىندى وزبەكستان رەسپۋبليكاسىنىڭ انيماتورى دميتري ۆلاسوۆ «گونچار» قيال- عاجايىپ ەرتەگىسىمەن السا، ەكىنشى ورىنعا تۇركيا مەملەكەتىنەن كەلگەن اريف وسمانوگلۋنىڭ «تەڭىز قاراقشىلارى» فيلمى لايىق دەپ تانىلدى.
سونىمەن قاتار، قىرعىزستان رەسپۋبليكاسىنىڭ قاتىسۋشىلارى اعايىندى اسانبەك، ۋسانبەك التىنبايەۆتاردىڭ «پەرۆىي كامەن» جانە «جيزن» تۋىندىلارى دا ەكىنشى ورىن الدى. ال، الماتىلىقتاردىڭ «ماقتانشاق قىز» انيماتسيالىق فيلمى مەن ساحا رەسپۋبليكاسىنىڭ قاتىسۋشىسى كونستانتين تيموفەيەۆتىڭ «الاا موگۋس» فيلمى جانە شىمكەنتتىك ايماحان مۇراتبەكوۆتىڭ «قازاقستان برەندى» فيلمدەرى ءۇشىنشى ورىنعا تۇراقتادى. بۇدان بولەك، تۇركيالىق نۋريللاح يەنيحاننىڭ «قوجاناسىر» فيلمى «ۇزدىك تەلەۆيزيالىق جوبا»، الماتىلىق ءسالىمعالي مىرزاشيەۆتىڭ «بايقوڭىر» بالالار فيلمى «ۇزدىك سسەناري»، شىمكەنتتىك 8 جاسار جاس دارىن سوفيا چمۋلدىڭ «مامونتەنوك يشەت مامۋ» فيلمدەرى «ەڭ جاس انيماتور» ارنايى جۇلدەلەرىن الدى. التاي رەسپۋبليكاسىنان كەلگەن اناستاسيا مايجەگيشيەۆانىڭ «ۆ سەردتسە»، شىمكەنت قالاسىنان كەلگەن وڭلاسىن بورىبەكوۆتىڭ «اپەندىنىڭ الەگى»، استانا قالاسىنان كەلگەن سالتانات ەرسۇلتاننىڭ «ارمان» انيماتسيالىق فيلمدەرى ىنتالاندىرۋ جۇلدەلەرىنە يە بولدى.
ايتا كەتەيىك، ەلباسى ن. ءا. نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسى نەگىزىندە ۇيىمداستىرىلعان فەستيۆال تۇركىتىلدەس مەملەكەتتەر اراسىنداعى مادەنيەت پەن ونەر ىنتىماقتاستىعىن جانە دوستاستىعىن نىعايتۋ ماقساتىندا وتكىزىلگەن بولاتىن.
