15:23, 22 - قىركۇيەك 2017 | GMT +5
قازاق كۇرەسى بولعاندىقتان نامىسقا تىرىستىم - ايبەك نۇعىماروۆ
اشحاباد. قازاقپارات - تۇرىكمەنستان استاناسى اشحابادتا ازيا چەمپيوناتىندا قازاق كۇرەسىنەن ايبەك نۇعىماروۆ قىرعىز پالۋانى نازار دۋرديەۆتەن باسىم ءتۇسىپ، چەمپيون اتانعان بولاتىن. «قازاقپارات» ءتىلشىسى پالۋاننىڭ وزىمەن تىلدەسىپ، قۋانىشىمەن ءبولىستى.

- ايبەك، جەڭىس قۇتتى بولسىن! ازيا چەمپيونى اتاندىڭ. جالپى، جارىس ءوزىڭ ءۇشىن قالاي بولدى؟
- شۇكىر دەيمىز. «الەم بارىسى» تۋرنيرىنەن كەيىن، ەسىمىزدى جيىپ ۇلگەرمەي، وسىندا كەلدىك. ءسال اۋىرلاۋ بولعان سياقتى. قارىمدى قارسىلاستار جولىقتى. فينالداعى بەلدەسۋ وڭايعا سوقپادى.
- جەڭىمپاز اتانعاننان كەيىنگى كوڭىل- كۇيىڭ قالاي؟
- التىن الىپ جاتىرمىز. قۋانىشتىمىن. قازاق كۇرەسى بولعان سوڭ، نامىسقا تىرىستىم.
- ۇيىمداستىرۋ جاعى، جارىس تۋرالى نە ايتاسىڭ؟
- ريزامىز. تۇرىكمەن باۋىرلار جوعارى دەڭگەيلى جارىس ۇيىمداستىرىپ جاتىر. ءبارى كوڭىلىمىزدەن شىقتى دەپ سەنىممەن ايتا الامىز. كورشى ەلگە العىس بىلدىرەمىز.
- كوپ راحمەت، ايبەك!
سۇحباتتاسقان اسقار اعاتايەۆ