ايبەك نۇعىماروۆ اشحابادتا چەمپيون اتاندى

استانا. قازاقپارات - تۇرىكمەنستان استاناسى اشحاباد قالاسىندا ءوتىپ جاتقان جاۋىنگەرلىك ونەر تۇرلەرى بويىنشا جابىق عيماراتتاعى V ازيا ويىندارىندا قازاقستاندىق بالۋاندار قازاق كۇرەسىنەن 2 التىن، 1 قولا مەدال جەڭىپ الدى، دەپ حابارلايدى قازاقپارات ءتىلشىسى.

2013-جىلعى «قازاقستان بارىسى» جانە بيىلعى «الەم بارىسى» ءتۋرنيرىنىڭ جەڭىمپازى ايبەك نۇعىماروۆ 90+ ك گ سالماقتا چەمپيون اتاندى. وتانداسىمىز تاجىك بالۋانى ديلوۆار گۋلوۆتى، تۇرىكمەن بالۋاندارى كۋۋات نۋرەۋ جانە نازار دۋرديەۆتى جەڭىپ، فينالعا شىقتى. اقتىق سىندا ايبەك قىرعىزستاندىق تىلەك كۋالوۆتان ايلاسىن اسىرىپ، ەل قورجىنىنا التىن مەدال سالدى.

ال 70 ك گ سالماقتا ونەر كورسەتكەن قازاقستاندىق بالۋان قاسىمحان تۇلەنباي قارسىلاس شاق كەلتىرمەي، اقتىق سىندا تۇرىكمەن بالۋانىن مەدالدان قاپى قالدىردى. سونداي-اق 90 ك گ سالماقتا ەل نامىسىن قورعاعان ءادىلجان ىستىبايەۆ قولا مەدال جەڭىپ الدى. بۇعان دەيىن حابارلاعانىمىزداي، قازاق كۇرەسى جابىق كەشەندەگى ازيا ويىندارىنىڭ باعدارلاماسىنا ەنگىزىلدى. مەدالدار ءۇش سالماق ساناتى بويىنشا ساراپقا سالىنۋدا.