ورالدا «ءتىل - تۇتاستىق تۋى» فەستيۆالى قورىتىندىلاندى
شاراعا قاتىسقان وبلىس اكىمى التاي كولگىنوۆتىڭ اتاپ وتكەنىندەي، قازاقستان تاۋەلسىزدىك العاننان بەرگى شيرەك عاسىردان استام ۋاقىت ىشىندە العا نىق قادام باسسا، سونىڭ ءبارى - ەل بىرلىگىنىڭ ارقاسى، ەلباسى جۇرگىزىپ كەلە جاتقان سارابدال ساياساتتىڭ جەمىسى. بيىل دا ەلىمىز ءۇشىن ەرەكشە جىل بولىپ وتىر. مەملەكەت باسشىسى «رۋحاني جاڭعىرۋ» باعدارلاماسىن جاريا ەتىپ، الداعى باعىت- باعدارىمىزدى ايقىن كورسەتىپ بەردى.
شىندىعىندا دا رۋحاني جاڭعىرۋسىز العا باسۋ قيىن. ەلدەگى كەلىسىم مەن ىنتىماقتىڭ ناتيجەسىندە مەملەكەتتىك باعدارلامالار ارقىلى مىڭداعان جۇمىس ورىندارى اشىلىپ، ينفراقۇرىلىم دامىپ، كوپتەگەن كاسىپورىندار جۇمىس جاساپ جاتىر. ءبىر عانا «نۇرلى جول» باعدارلاماسى ارقىلى وبلىسقا 28 ميلليارد تەڭگە ءبولىنىپ، سول قارجىعا قىرۋار شارۋا اتقارىلۋدا. مىسالى، بيىل وبلىس كولەمىندە 500 شاقىرىم جول جوندەلۋدە. ورال قالاسىنىڭ وزىندە بۇل ماقساتقا 8,1 ميلليارد تەڭگە ءبولىنىپ، بۇرىن- سوڭدى بولماعان جۇمىس جاسالۋدا. «نۇرلى جەر» باعدارلاماسى اياسىندا وڭىردە بيىل 1600 تۇرعىن باسپانالى بولماقشى.
«رۋحاني جاڭعىرۋ» باعدارلاماسىنىڭ باستى ماقساتى - حالىقتى بىرىكتىرۋ، تاريحىمىزدى تۇگەندەپ، بولاشاعىمىزدى ايقىنداي ءتۇسۋ. تەك ءبىزدىڭ وڭىردە عانا سەكسەننەن استام ۇلت وكىلدەرى تۇرادى. ءبىز ءبىرتۇتاس ۇلتپىز. وسى رەتتە مەملەكەتتىك ءتىلىمىزدىڭ بارشا ۇلت وكىلدەرىن ۇيىستىرۋداعى ءرولى ايرىقشا. احمەت بايتۇرسىن ۇلى ايتقانداي، ەلدى ساقتاپ قالاتىن ءتىل. ءتىل باردا مەملەكەت تە بار. كوپ ءتىل بىلگەننىڭ ارتىقشىلىقتارىن استانادا وتكەن «ەكسپو-2017» حالىقارالىق كورمەسى دە دالەلدەپ بەردى. اسىرەسە، قازىرگى جاستارعا كوبىرەك ءتىل مەڭگەرىپ، جاڭا تەحنولوگيالاردى يگەرۋگە كەڭىنەن جول اشىلىپ وتىر. وسى مۇمكىندىكتەردى پايدالانا بىلگەننىڭ كەلەشەگى دە جارقىن بولماق. شارا بارىسىندا ءتىل جاناشىرلارى وبلىس اكىمىنىڭ العىس حاتتارىمەن ماراپاتتالدى. سونداي- اق ءتۇرلى بايقاۋ جەڭىمپازدارىنا وبلىستىق تىلدەردى دامىتۋ باسقارماسىنىڭ ماراپاتتارى دا تابىس ەتىلدى.
اۆتور: ەلجان ەرالى
