داۋرەن ابايەۆ: «سيفرلىق قازاقستان» باعدارلاماسىنىڭ ءساتتى جۇزەگە اسىرىلۋىنا كۇش سالۋىمىز كەرەك

استانا. قازاقپارات - «حابار» ارناسىنداعى «اشىق ديالوگ» باعدارلاماسىندا قوناق بولعان ق ر اقپارات جانە كوممۋنيكاتسيالار ءمينيسترى داۋرەن ابايەۆ «سيفرلىق قازاقستان» باعدارلاماسىنا قاتىستى جۇرگىزىلىپ جاتقان جۇمىس تۋراسىندا ايتىپ ءوتتى، دەپ حابارلايدى «قازاقپارات» ح ا ا ءتىلشىسى.

«مەملەكەت باسشىسى بىزگە بۇل باعدارلامانى تاعى جەتىلدىرۋ ءۇشىن ۋاقىت بەرىپ وتىر. مەن باعدارلامانىڭ جۇمىسى ءتيىمدى بولا تۇسەر دەگەن ويدامىن. ءيا، ءبىزدىڭ مينيسترلىك ءۇشىن، بۇكىل ۇكىمەت ءۇشىن «سيفرلىق قازاقستان» باعدارلاماسىنىڭ ماڭىزى وتە زور. جىلدىڭ باسىندا مەملەكەت باسشىسى بۇل تۋرالى ايتا كەلە ءبىزدىڭ الدىمىزعا تاپسىرما جۇكتەدى. وسى ۋاقىتتا ءبىز حالىقارالىق كونسۋلتانتتارمەن بىرگە باعدارلامانى وتە ءجىتى تۇردە زەرتتەدىك. بارلىق مەملەكەتتىك ورگاندار جۇمىلدىرىلدى. بۇل باعدارلاما تەك اقپارات جانە كوممۋنيكاتسيالار مينيسترلىگىنە عانا قاتىستى ەمەس، تسيفرلاندىرۋ ماسەلەسى اۋىل شارۋاشىلىعى، دەنساۋلىق ساقتاۋ، ينۆەستيتسيالار جانە دامۋ مينيسترلىگىنە، قۇقىق قورعاۋ ورگاندارىنا دا قاتىستى بولادى. پرەمەر- مينيستر باعدارلامانى ءجىتى تانىستىرىپ، قانداي باعىتتا جۇمىس جۇرگىزۋ كەرەكتىگى ايتىلدى. ءبىز باعدارلامانىڭ ءساتتى جۇزەگە اسىرىلۋىنا كۇش سالۋىمىز كەرەك»، - دەيدى داۋرەن ابايەۆ.

 سونىمەن قاتار، داۋرەن ابايەۆ «باعدارلامانىڭ جۇزەگە اسىرىلۋ ۋاقىتى نەلىكتەن جىلدىڭ سوڭىنا قالىپ وتىر؟» دەگەن ساۋالعا جاۋاپ بەردى.

 «مەملەكەت باسشىسى، بالكىم، باسا ماڭىز بەرىلەر تاعى ءبىر تۇستاردى بايقاپ قالعان بولۋى كەرەك. جالپى، 2-3 ايلىق ۋاقىت جۇزەگە اسىرۋ تۇرعىسىنان شەكتى مەرزىم ەمەس، الايدا وسى ارالىق باعدارلاما تولىققاندى قالىپقا كەلۋى ءۇشىن ماڭىزدى»، - دەپ ءتۇيدى داۋرەن ابايەۆ. فوتو: باۋىرجان جۋاسبايەۆ

اۆتور: ايان بەكەن ۇلى