كورەيا پرەزيدەنتى قازاقستان حالقىنا العىس ايتتى - فوتو

بۇگىن الماتىدا قازاقستان كارىستەرى قازاق جەرىنە جەر اۋدارلىعانىنا 80 جىل تولعانىن ەسكە الىپ، رەسپۋبليكا سارايىندا سالتاناتتى كەش وتكىزدى.
سالتاناتتى كەشكە قازاقستانداعى كارىستەر مەن كورەيا رەسپۋبليكاسىنان ارنايى قوناقتار كەلدى. كەشتىڭ اشىلۋىندا قازاقستان حالقى اسسامبلەياسىنىڭ ءتوراعاسى، ق ر پرەزيدەنتى اكىمشىلىگى ق ح ا حاتشىلىعىنىڭ مەڭگەرۋشىسى دارحان مىڭباي ق ر پرەزيدەنتى نۇرسۇلتان نازاربايەۆتىڭ شاراعا وراي جولداعان حاتىن وقىپ بەردى.
«قۇرمەتتى وتانداستار، كارىستەردىڭ قازاقستاندا تۇرىپ جاتقانىنا 80 جىل تولعان مەرەيلى مەرەكەمەن سىزدەردى قۇتتىقتايمىن. سىزدەر ءتوزىم مەن ەڭبەكتىڭ ارقاسىندا، ىنتىماق پەن قازاق حالقىنا تۇسكەن قيىندىقتى بولىسە بىلگەن بىرلىكتەرىڭىزبەن اۋىرتپاشىلىقتى كوتەرە بىلدىڭىزدەر. بۇگىندە كارىس ەتنوسى- تۇتاس قازاقستاننىڭ اجىراماس بولىگى، ال ونىڭ وكىلدەرى قازاقستاننىڭ ەكونوميكالىق، الەۋمەتتىك، عىلىمي سالاسىنا ولشەۋسىز ۇلەس قوسىپ كەلەدى. قازاقستان كارىستەرىنىڭ قاۋىمداستىعى ەلىمىزدىڭ بىرلىگىنە قىزمەت ەتەتىن ازاماتتىق قوعامنىڭ ءتيىمدى ينستيتۋتىنا اينالدى. تاريحي وتانىمەن قارىم- قاتىناسىن ساقتاي وتىرىپ، كارىس ەتنوسىنىڭ كوپتەگەن وكىلى وسى الەۋەتتەرىن قازاقستان مەن كورەيانىڭ ارىپتەستىگى مەن ىنتىماعىن ارتتىرۋعا جۇمساپ كەلەدى»، - دەلىنگەن ەلباسى حاتىندا.
ەلباسى حاتى وقىلعاننان كەيىن، كورەيا رەسپۋبليكاسىنىڭ پرەزيدەنتى جولداعان بەينەقۇتتىقتاۋ كورسەتىلدى.
«قازاقستان مەن كورەيانىڭ دوستىعىن نىعايتۋ جولىندا سىزدەر از كۇش جۇمساعان جوقسىزدار. مەن سىزدەرمەن ماقتانامىن. قازاقستاندا كارىستەردى قۇرمەتتەيدى، ءتىپتى «ءتورتىنشى جۇزگە» جاتقىزادى. مەن مۇنى قازاقستانعا جەر اۋدارىلعان العاشقى بۋىننىڭ ەڭبەگىنىڭ ءارى قازاقستاننىڭ تولەرانتتى ساياساتىنىڭ ناتيجەسى دەپ ەسەپتەيمىن. كارىس دياسپوراسىنىڭ العاشقى بۋىنىنا، ءارى قازاقستان پرەزيدەنتىنە العىسىمدى بىلدىرەمىن. ولاردىڭ وتكەنى، سول جىلدارداعى قيىندىقتاردى ەڭسەرە بىلگەن قازاقستاننىڭ دا، كورەيانىڭ دا ماقتانىشى. قازاقستاندا كورەيانىڭ تاۋەلسىزدىگى ءۇشىن كۇرەسكەن ۇلى تۇلعالاردىڭ ۇرپاقتارى ءومىر ءسۇرىپ جاتىر. كورەيا رەسپۋبليكاسى ونى ەشقاشان ۇمىتپايدى، سىزدەر سول تاريحتىڭ ءتىرى كۋاگەرىسىزدەر. ءبىز سىزدەردىڭ ۇلتتىق تۇتاستىقتارىڭىزدىڭ ساقتالۋىنا بەلسەندى قولداۋ كورسەتەتىن بولامىز. بۇگىنگى مەرەكە وتكەن كۇننىڭ ەستەلىگى، جارقىن بولاشاقتىڭ ءۇمىتى بولسىن دەپ تىلەيمىن. كورەيا حالقىنىڭ اتىنان سالەمىمدى قابىل الىڭىزدار»، - دەدى كورەيا رەسپۋبليكاسىنىڭ پرەزيدەنتى مۋن دجە ين بەينەجازبادا.
وسىدان كەيىن كورەيا ۇلتتىق اسسامبلەياسىنىڭ سپيكەرى چون سەگيۋننىڭ بەينەقۇتتىقتاۋى كورسەتىلدى. قازاق حالقىنا العىسىن بىلدىرگەن چون سەگيۋن كورەياداعى ىشكى ساياسي وقيعالارعا بايلانىستى اتالعان مەرەكەگە كەلە الماعانىن ايتتى.
«ەلدەگى ىشكى ساياسي جاعدايعا بايلانىستى سىزدەردى جۇزبە- ءجۇز ەمەس، بەينەجازبا ارقىلى قۇتتىقتاۋعا تۋرا كەلدى. ءبىز ەكونوميكانى دامىتۋعا دەن قويعان جىلدارى، سىزدەردىڭ وتانىمىزعا دەگەن ساعىنىشتارىڭىز بەن اۋىرتپاشىلىقتارىڭىزعا كوڭىل بولە المادىق، سول ءۇشىن كەشىرىم سۇرايمىز. ءبىز سىزدەردى قازاقستاندا سىيلايتىنىن بىلەمىز. سىزدەر قازاقستاننىڭ لايىقتى ازاماتى بولا بىلدىڭىزدەر»، - دەدى چون سەگيۋن.
سالتاناتتى كەشكە كورەيا رەسپۋبليكاسىنىڭ استاناسى - سەۋل قالاسىنان ارنايى كەلگەن ۇلتتىق اسپاپتار وركەسترى ونەر كورسەتتى. كەشتە قازاقستانداعى جەر اۋدارىلعان كارىستەردىڭ العاشقى بۋىنى، 6 اقساقالعا ق ر پرەزيدەنتى مەن كورەيا ۇلتتىق اسسامبلەياسى ءتوراعاسىنىڭ اتىنان العىس حات تابىس ەتىلدى.
اۆتور: الماس مۇقاش ۇلى