قۇتقارۋشىلار جۇرەك تۇسىنا تەمىر كىرگەن كولىك جۇرگىزۋشىسىن امان الىپ قالدى

قىزىلوردا. قازاقپارات -  قىزىلوردا قالاسىندا ب م ۆ كولىگى جانارماي قۇيۋ ستانساسىنىڭ قورشاۋىنا سوعىلدى.

الدىڭعى تەرەزەدەن ءوتىپ، جۇرگىزۋشىنىڭ كەۋدەسىنە كىرگەن قورشاۋدىڭ تەمىرىن الىپ شىعۋ ءۇشىن وقيعا ورنىنا قۇتقارۋشىلار شاقىرىلدى، دەپ حابارلايدى قازاقپارات ءتىلشىسى.

وبلىستىق ت ج د- دان ءمالىم ەتكەندەي، 20- قىركۇيەك كۇنى ساعات 06.23 تە وڭتۇستىك وڭىرلىك اەروۇتقىر جەدەل قۇتقارۋ جاساعىنىڭ كەزەكشىلىك بولىمىنە اباي داڭعىلى جانە بوكەيحان كوشەسىنىڭ قيىلىسى ماڭىندا جول كولىك اپاتى بولعانى حابارلاندى.

وقيعا ورنىنا 4 قۇتقارۋشى جانە 1 تەحنيكا جونەلتىلدى. انىقتالعانداي، ب م ۆ ماركالى كولىكتىڭ جۇرگىزۋشىسى رۋلگە يە بولا الماي، جانارماي قۇيۋ ستانساسىنىڭ قورشاۋىنا سوعىلعان. قاتتى سوققىدان قورشاۋدىڭ تەمىرى الدىڭعى تەرەزەدەن ءوتىپ، جۇرگىزۋشىنىڭ كەۋدەسىنە - جۇرەك تۇسىنا كىرگەن.

قۇتقارۋشىلار جۇرگىزۋشىنىڭ باسىن قورعانىش ماتەريالمەن جاۋىپ، تەمىردى كەسۋگە كىرىسكەن. حابارلانعانداي، جەدەل جاساق قىزمەتكەرلەرىنە ءتىرى ادامنىڭ دەنەسىنە كىرگەن تەمىردى كەسۋ قيىنعا سوققان.

ولار مەتالدى مۇمكىندىگىنشە تىعىز ۇستاپ تۇرۋعا تىرىسقان. سەبەبى اۋىرسىنۋدان شوك تۋىنداپ، زارداپ شەگۋشىگە قوسىمشا زيان كەلۋى مۇمكىن ەدى. جۇرگىزۋشى ەستەن تالىپ قالماس ءۇشىن قۇتقارۋشىلاردىڭ ءبىرى ونىمەن جۇمىسى، وتباسى تۋرالى اڭگىمەلەسىپ تۇرعان.

ابىراي بولعاندا، قۇتقارۋ وپەراتسياسى ءساتتى وتكەن. زارداپ شەگۋشى كەۋدەسىندەگى تەمىردىڭ قالعان بولىگىمەن جەدەل جاردەم قىزمەتكەرلەرىنە تاپسىرىلدى. قۇتقارۋشىلاردىڭ جەدەل ءىس-ارەكەتىنىڭ ناتيجەسىندە اۆتوكولىك جۇرگىزۋشىسى ءتىرى قالدى.