الماتىدا «شالا قازاق» اتتى فيلمنىڭ تۇسىرىلىمدەرى اياقتالدى

استانا. قازاقپارات - ش. ايمانوۆ اتىنداعى «قازاقفيلم» كينوستۋدياسىندا قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن «شالا قازاق» اتتى تولىقمەتراجدى كوركەم فيلمنىڭ ءتۇسىرىلىم جۇمىستارى اياقتالدى.

 ۆەستەرن جانرىندا تۇسىرىلگەن جاڭا كينوتۋىندى قىلمىسكەرلەرمەن جالعىز ءوزى كۇرەسكە تۇسكەن اۋىلدىڭ ۋچاسكەلىك پوليتسەيى تۋرالى باياندايدى، رەجيسسەرى - تولەگەن بايتۇكەنوۆ.

«ءبىز بۇل جوباعا بىلتىر كوكتەمنەن باستاپ كىرىستىك. سول كەزدەن سسەناري كوپتەگەن وزگەرىستەرگە ۇشىرادى. باسىندا كومەديا ءتۇسىرۋدى جوسپارلاعان ەدىك. سسەناريدىڭ سوڭعى نۇسقاسى 6 اي بۇرىن عانا جازىلىپ ءبىتتى، بۇل نۇسقانىڭ دۇنيەگە كەلۋىنە «ACTION» رەجيسسۋرا جانە مونتاجداۋ شەبەرحاناسىنىڭ تىڭدارمانى - اندرەي تەن جانە مەنىڭ جارىم يننا اتسالىستى. فيلمنىڭ قازىرگى اتاۋىنان ەش جۇرناق قالمادى دەسەم ارتىق ايتپاعان بولار ەدىم. فيلمنىڭ اتاۋىن الدا مىندەتتى تۇردە وزگەرتەمىز. فيلمنىڭ جانرى - ۆەستەرن. مەنىڭ ويىمشا، بۇل جانردا تۇسىرىلگەن فيلمدەر قازاقستاندا جوقتىڭ قاسى. ۆەستەرن ءتۇسىرۋ ءۇشىن بىزدە جازىق دالا دا، تۇلپارلار دا، قايراتتى جىگىتتەر دە بار. جانە دە ۆەستەرن ۋاقىت وتە كەلە ا ق ش قوعامىندا ورىن العان وزگەرىستەردى ايقىن كورسەتە الدى. باسقاشا ايتقاندا، ۆەستەرن تاريحى - بۇل امەريكانىڭ كوڭىل- كۇي تاريحى. وسى ۆەستەرننىڭ قالىبىن ءبىزدىڭ ەلگە الىپ كەلۋدى بۇرىننان ويلاپ جۇرگەم»، - دەدى كارتينانىڭ رەجيسسەرى.

 ەستەرىڭىزگە سالا كەتسەك، فيلمنىڭ ءتۇسىرۋ جۇمىستارى ۇستىمىزدەگى جىلى 10 - تامىزدا باستالىپ، 21 كۇنگە سوزىلعان. كارتينانىڭ ءتۇسىرۋ جۇمىستارى الماتى وبلىسى قاپشاعاي قالاسىنان 40 شاقىرىم جەردە ورنالاسقان بريگادير №4 اۋىلىندا وتكەن.

www.24.kz