21:08, 20 - قىركۇيەك 2017 | GMT +5
ەلباسى «باتىر بابالار» مەموريالدىق كەشەنىندە بولدى
استانا. قازاقپارات - مەملەكەت باسشىسى الماتى قالاسىنا جانە الماتى وبلىسىنا جۇمىس ساپارى بارىسىندا قاراساي اۋدانى رايىمبەك اۋىلدىق وكرۋگىنىڭ اۋماعىندا ورنالاسقان «باتىر بابالار» مەموريالدىق كەشەنىنە باردى، دەپ حابارلايدى اقوردانىڭ باسپا ءسوز قىزمەتى.

نۇرسۇلتان نازاربايەۆ مەموريالدىق كەشەندەگى قازاقستاننىڭ ساق مادەنيەتىنەن باستاپ الاشوردا ۇكىمەتىنىڭ قۇرىلۋىنا دەيىنگى تاريحىن بەينەلەيتىن ەكسپوزيتسيالارمەن تانىستى. مەموريالدىڭ ورتالىق بولىگى قازاقتىڭ باتىرلارىنا ارنالعان. سونىمەن قاتار، ەلباسىعا ەل تاۋەلسىزدىگى جولىنداعى كۇرەستە تانىمال بولعان بەلگىلى تاريحي قايراتكەرلەر - حاندار، بيلەر جانە باتىرلار سۋرەتتەرىنىڭ گالەرەياسى كورسەتىلدى. مەملەكەت باسشىسى قاراساي اۋدانىنىڭ جۇرتشىلىق وكىلدەرىمەن كەزدەستى. وندا ءوڭىردىڭ الەۋمەتتىك- ەكونوميكالىق ماسەلەلەرى مەن الماتى وبلىسىنىڭ دامۋ پەرسپەكتيۆالارى تالقىلاندى.