وڭتۇستىك كورەياعا قازاقستاننان باراتىن تۋريستەردىڭ سانى ارتقان

باسىلىمنىڭ مالىمدەۋىنشە، وڭتۇستىك كورەيانىڭ تۋريزمدى دامىتۋ اگەنتتىگىندەگىلەر ەلگە شەتەلدەردەن كەلىپ جاتقان تۋريستەردىڭ سانى ۇستىمىزدەگى جىلدىڭ العاشقى جەتى ايىندا ءوسۋ تەندەنتسياسىن كورسەتكەنىن ايتادى. ولار مۇنى ەل ۇكىمەتىنىڭ قىتايدان كەلەتىن تۋريستەردىڭ كۇرت ازايۋىنا بايلانىستى وڭتۇستىك كورەيا تۋريستىك پورتفەلىن ديۆەرسيفيكاتسيالاۋعا كۇش سالۋىمەن تۇسىندىرۋدە.
كورەيا تۋريستىك ۇيىمىنىڭ (ك ت ۇ) مالىمەتتەرى بويىنشا بيىلعى قاڭتار- شىلدەدە جىلدىق ەسەپتە ۆەتنامنان كەلەتىن تۋريستەردىڭ سانى 29,2 پايىزعا، قازاقستاننان 26,8 پايىزعا جانە يراننان كەلەتىندەردىڭ سانى 25,6 پايىزعا ارتقان. ەلدىڭ تۋريزم يندۋسترياسى تاياۋ شىعىس پەن وڭتۇستىك- شىعىس ازيا ەلدەرىنەن كەلەتىن تۋريستەردى كوبەيتۋگە كۇش سالىپ جاتقانى ايتىلادى. وڭتۇستىك كورەياداعى قىتايلىق تۋريستەردىڭ سانى سوڭعى بەس ايدا ازايا وتىرىپ، شىلدەدە 70 پايىزعا دەيىن قىسقارعان. بىلتىر وڭتۇستىك كورەياداعى شەتەلدىك 17 ميلليون تۋريستىڭ شامامەن جارتىسى قىتايلىق ازاماتتار بولعان.
كورەيا تۋريستىك ۇيىمى شەتەلدەن تۋريست تارتۋ جۇمىستارىن ودان ءارى جالعاستىراتىنىن مالىمدەدى. تۋريستىك اگەنتتىكتەر دە جەرگىلىكتى تۇرعىندار اراسىندا ىشكى ءتۋريزمدى دامىتۋ ماقساتىندا ەل وڭىرلەرىمەن ىنتىماقتاستىقتى جانداندىرۋدى جوسپارلاپ وتىر. كتۇ مالىمەتتەرىنە قاراعاندا، قاڭتار- شىلدە ايلارىندا 15 ميلليون وڭتۇستىك كورەيالىق شەتەلگە ساياحاتتاۋعا شىققان، ال بۇل وسى كەزەڭدە سىرتتان كەلگەن تۋريستەردىڭ سانىنان ەكى ەسەگە كوپ.