استانا قارجى ورتالىعى قازاقستان ەكونوميكاسىنا نە بەرەدى - قايرات كەلىمبەتوۆتىڭ جاۋابى

استانا. قازاقپارات - وتاندىق جانە شەتەلدىك ب ا ق الدىندا باسپا ءسوز ءماسليحاتىن وتكىزگەن «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ اتالعان ورتالىقتىڭ قازاقستان ەكونوميكاسىنا نە بەرەتىنى تۋرالى ساۋالعا جاۋاپ بەردى، دەپ حابارلايدى «قازاقپارات» ح ا ا ءتىلشىسى.

 «استانا حالىقارالىق قارجى ورتالىعى ەڭ الدىمەن تىكەلەي شەتەلدىك ينۆەستيتسيالاردى تارتادى. وزدەرىڭىز بىلەتىندەي، قازاقستان ەكونوميكاسى سوڭعى 10-15 جىلدا وتە جوعارى قارقىندا دامىدى. وسى ارالىقتا 200 ميلليارد ا ق ش دوللارىنا جۋىق شەتەلدەن ينۆەستيتسيا تارتتىق. ال وسى ينۆەستيتسيالار كوپ جاعدايدا تابيعي رەسۋرستارعا تارتىلعان بولاتىن. بۇگىن بىزگە وڭتايلى سەكتورلارعا ءالى دە تارتىپ جاتىرمىز. سوندىقتان، استانا ح ق و ەڭ الدىمەن شەتەلدىك ينۆەستيتسيالاردى تارتۋداعى «تەرەزە» ىسپەتتەس. سايكەسىنشە ەكونوميكامىز دامىپ، ۇلتتىق ۆاليۋتامىز تۇراقتى بولا تۇسەدى»، - دەدى قايرات كەلىمبەتوۆ.

ەسكە سالا كەتسەك، ق ر پرەزيدەنتى نۇرسۇلتان نازاربايەۆتىڭ باستاماسىمەن قۇرىلعان ا ح ق و ۇزاق مەرزىمدىك دامۋعا باعىتتالعان بەس ينستيتۋتسيونالدىق رەفورمانى جۇزەگە اسىرۋعا ارنالعان «100 ناقتى قادام» ۇلت جوسپارىنىڭ بولىگى. ا ح ق و- نىڭ ارنايى مارتەبەسى ق ر كونستيتۋتسيالىق زاڭىمەن زاڭدى تۇردە بەكىتىلگەن. ت م د ەلدەرى اراسىندا تۇڭعىش رەت اعىلشىن ساۋدا قۇقىعى قاعيداتتارى مەن الەمدىك بەلدى قارجى ورتالىقتارىنىڭ تالاپتارىنا سايكەس (لوندون، نيۋ- يورك، گونگكونگ، سينگاپۋر، دۋباي جانە ت. ب) قۇرىلعان وزىندىك قۇقىقتىق ارنايى قۇزىرەتتىك اۋماق ا ح ق و- دا قۇرىلماق. ا ح ق و بازاسىندا الەمدىك مىقتى تالاپتارعا ساي جوعارى تەحنولوگيالىق جاڭا بيرجا ىسكە قوسىلاتىن بولادى. ا ح ق و- نىڭ نەگىزگى ستراتەگيالىق دامۋى كاپيتال نارىقتارىن دامىتۋ، اكتيۆتەردى باسقارۋ، جەكە تۇلعالاردىڭ داۋلەتىن باسقارۋ، يسلامدىق قارجىلاندىرۋ، قارجىلىق تەحنولوگيا سەكىلدى باعىتتاردى قامتيدى.

 اۆتور: ايان بەكەن ۇلى