باسپانانى «تۇرعىن ءۇي كۋالىگىمەن» تەزدەتىپ الۋعا بولادى

استانا. قازاقپارات - ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا كوشى- قون تۇجىرىمداماسىنىڭ جاڭا جوباسى اياسىندا «تۇرعىن ءۇي كۋالىكتەرىن» ەنگىزۋدى ۇسىندى، دەپ حابارلايدى قازاقپارات ءتىلشىسى.

«بىرىنشىدەن، كوشىپ بارعان وتباسىنىڭ ءاربىر مۇشەسىنە مەملەكەتتىك سۋبسيديا تولەنەدى. ەكىنشىدەن، ءبىر جىلعا دەيىن باسپانانى جالعا الۋ شىعىندارى وتەلەدى. ال ول ءۇيدى بىردەن ساتىپ الۋعا مۇمكىندىك بولسا، ءبىر جىلدىق سۋبسيديانى تولىعىمەن بەرۋگە بولادى. ۇشىنشىدەن، «تۇرعىن ءۇي كۋالىكتەرى» جۇيەسى نەگىزىندە تۇرعىن ءۇي قۇرىلىس جيناق بانكىنەن زاەم الۋعا بولادى. وندايدا «تۇرعىن ءۇي كۋالىگىنىڭ» 50 پايىزىن جەرگىلىكتى اتقارۋشى ورگاندار تولەيدى دەگەن جوسپار بار. قالعانىن رەسپۋبليلىق بيۋدجەتتەن بەرىلەتىن سۋبسيديامەن وتەلەدى»، - دەيدى دۇيسەنوۆا.

ءمينيستردىڭ سوزىنە قاراعاندا، «تۇرعىن ءۇي كۋالىگىن» ءۇيدى تولىعىمەن ساتىپ الۋعا، ءيا بولماسا، باسپانانىڭ العاشقى جارناسى رەتىندە قولدانۋعا مۇمكىندىك بار. بۇدان بولەك، تامار قاسىم قىزى ەڭبەك رەسۋرستارى تاپشى ايماقتارعا كوشىپ بارعان ازاماتتارعا اۋىل شارۋاشىلىعى جەرلەرىن كونكۋرسسىز بەرۋدى ۇسىنىپ وتىر. «وسى شارالاردىڭ ناتيجەسىندە ەڭبەك رەسۋرستارىنىڭ ۇتقىرلىعىن ارتتىرىپ، حالىقتى ەكونوميكانىڭ سۇرانىسىنا قاراي قونىستانداندىرا الامىز»، - دەپ اتاپ كورسەتتى مينيستر.

ايتا كەتەيىك، ۇكىمەتتىڭ بۇگىنگى وتىرىسىندا تامارا قاسىم قىزى كوشى- قون ساياساتىنىڭ 2017-2020 -جىلدارعا ارنالعان تۇجىرىمداماسى جوباسىن تانىستىردى. اتالعان قۇجاتتا شەتەلدەگى ەتنيكالىق قازاقتارمەن، ولاردىڭ ىشىندە دارىندى ءارى ىسكەر ازاماتتارمەن تىعىز بايلانىس ورناتۋعا دا نەگىزگى باسىمدىق بەرىلگەن. سونداي-اق جوعارى بىلىكتى مامانداردى جەڭىلدەتىلگەن تارتىپپەن جۇمىسقا الۋ جايى دا قاراستىرىلىپ وتىر.