ەتنيكالىق قازاقتاردىڭ ەلگە ورالۋ كورسەتكىشى ارتىپ وتىر - تامارا دۇيسەنوۆا

استانا. قازاقپارات - ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا، كوشى-قون ساياساتىنا قاتىستى زاڭناما وزگەرگەلى بەرى شەتەلدەگى قانداستارامىزدىڭ ەلگە ورالۋ كورسەتكىشى ءوستى، دەپ حابارلايدى قازاقپارات ءتىلشىسى.

«ەتنيكالىق قازاقتاردىڭ قايتا ورالۋىنا، بەيىمدەلۋىنە جانە كىرىگۋىنە كەدەرگى كەلتىرەتىن بىرنەشە پروبلەمالار وتكەن جىلدان باستاپ كۇشىنە ەنگەن زاڭ اياسىندا ءوز شەشىمىن تاپتى. اتاپ ايتساق، ەتنيكالىق قازاقتارعا ورالمان مارتەبەسى قونىستانۋ ايماعىنا قاراماستان ءبىر جىلعا بەرىلە باستادى. ولاردىڭ قازاقستان رەسپۋبليكاسى ازاماتتىعىن الۋ مەرزىمى ءتورت جىلدان ءبىر جىلعا قىسقارتىلدى. بۇدان بولەك، قانداستارىمىزدى ۇتىمدى قونىستاندىرۋ ماقساتىندا قوسىمشا ەڭبەك رەسۋرستارىن قاجەت ەتەتىن ايماقتارعا جولداۋ شارالارى قابىلداندى. ناتيجەسىندە وتكەن جىلى ەلىمىزگە 16,5 مىڭ ورالمان وتباسى كوشىپ كەلدى. ول 2015 -جىلمەن سالىستىرعاندا، 8,5 ەسەگە ارتىق»، - دەپ اتاپ كورسەتتى دۇيسەنوۆا ۇكىمەت وتىرىسىندا.

ايتا كەتەيىك، ۇكىمەتتىڭ بۇگىنگى وتىرىسىندا تامارا قاسىم قىزى كوشى-قون ساياساتىنىڭ 2017-2020 -جىلدارعا ارنالعان تۇجىرىمداماسى جوباسىن تانىستىردى. اتالعان قۇجاتتا شەتەلدەگى ەتنيكالىق قازاقتارمەن، ولاردىڭ ىشىندە دارىندى ءارى ىسكەر ازاماتتارمەن تىعىز بايلانىس ورناتۋعا نەگىزگى باسىمدىق بەرىلگەن. جوعارى بىلىكتى مامانداردى جەڭىلدەتىلگەن تارتىپپەن جۇمىسقا الۋ جايى دا قاراستىرىلعان.