شەتەلدەگى دارىندى ءارى بىلىكتى قازاقتارمەن تىعىز بايلانىس ورناتىلادى

استانا. قازاقپارات - قازاقستاننىڭ جاڭا كوشى-قون تۇجىرىمداماسىندا شەتەلدەگى ەتنيكالىق قازاقتارمەن، ولاردىڭ ىشىندە دارىندى ءارى ىسكەر ازاماتتارمەن تىعىز بايلانىس ورناتۋعا نەگىزگى باسىمدىق بەرىلگەن.

جوعارى بىلىكتى مامانداردى جەڭىلدەتىلگەن تارتىپپەن جۇمىسقا الۋ جايى دا قاراستىرىلىپ قويعان، دەپ حابارلايدى قازاقپارات ءتىلشىسى.

ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا، اتالعان قۇجاتتىڭ نەگىزگى باعىتتارىنىڭ ءبىرى - ەتنيكالىق كوشى-قون. «تۇجىرىمدامانىڭ اياسىندا ءبىز مەملەكەت باسشىسىنىڭ دۇنيەجۇزى قازاقتارىنىڭ V قۇرىلتايىندا بەرگەن تاپسىرمالارىن قاراستىردىق. وعان سايكەس، ەتنيكالىق قازاقتاردى تەك كوشىرىپ الۋ ماسەلەسىن قانا قاراستىرماي، ولاردىڭ الەۋەتىن تۇرعىلىقتى جەرىندە قالدىرا وتىرىپ، پايدالانۋ مۇمكىندىگى ۇسىنىلدى. وسى ماقساتتا شەتەلدە تۇراتىن ەتنيكالىق قازاقتارمەن بايلانىس قارقىنىن كۇشەيتۋ كوزدەلۋدە. ول ءۇشىن دۇنيەجۇزى قازاقتارىنىڭ قاۋىمداستىعى ولاردىڭ تۇرعىلىقتى جەرلەرىندە مادەني ورتالىقتارىن قۇرۋىنا ىقپال جاساپ، قانداستارىمىزدىڭ ءبىر-بىرىمەن جانە قازاقستانمەن تىعىز قارىم-قاتىناسىن ۇيىمداستىراتىن بولادى»، - دەيدى دۇيسەنوۆا.

بۇدان بولەك، شەتەلدە تۇرىپ جاتقان ەتنيكالىق قازاقتاردى، سونىڭ ىشىندە بىلىكتى ماماندار مەن جەتىستىككە جەتكەن ازاماتتاردى تارتۋ ماقساتىندا جەكە ەلەكتروندى دەرەكقور جاساۋ قاراستىرىلىپ وتىر. ال جوعارى بىلىكتى ەتنيكالىق قازاقتارعا ۋاقىتشا جۇمىسقا كەلۋ مۇمكىندىگىن بەرۋ ءۇشىن جۇمىس بەرۋشىلەرگە رۇقساتتى جەڭىلدەتىلگەن تارتىپپەن تەگىن ۇسىنۋ تەتىگى ەنگىزىلمەكشى.

ايتا كەتەيىك، ۇكىمەتتىڭ بۇگىنگى وتىرىسىندا تامارا قاسىم قىزى كوشى-قون ساياساتىنىڭ 2017-2020 -جىلدارعا ارنالعان تۇجىرىمدامانىڭ جوباسىن تانىستىردى.