قايىن اتاسى ۇلىن اقبوتا كەرىمبەكوۆاعا لايىق كورمەگەنىن اشىپ ايتتى

استانا. قازاقپارات - قايىن اتاسى اقبوتا كەرىمبەكوۆا تۋرالى پىكىرىن ءبولىسىپ، باستاپقىدا وعان ۇلىن لايىق كورمەگەنىن اشىپ ايتتى.

بۇل تۋرالى 31 ارنانىڭ «ايتا بەرسىن» باعدارلاماسىندا ايتىلدى.

حالىقتىڭ سىنىنا راۋان داۋلەتوۆتىڭ اتا-اناسى دا الدىن الا دايىندالعان سىڭايلى. ۇلدارى ۇيلەنەتىنىن ايتقان كەزدە تاڭقالعاندارىن جاسىرمايدى تىلەگەن مىرزا مەن توتيا حانىم. ال بولاشاق كەلىندەرىنىڭ اقبوتا كەرىمبەكوۆا ەكەنىن ەستىگەن كەزدە، كەنجەلەرىنە «ءالى دە ويلانارسىڭ» دەپ اقىل ايتقان ەكەن.

«بالام توي تۋرالى ايتقان كەزدە، ايەلىم ەكەۋىمىز كوپ ويلاندىق. اقبوتا - ءومىردىڭ باسپالداقتارىنان شىڭدالىپ وتكەن قىز. ءوزىنىڭ تىرلىگى تۋرالى ەستىپ-ءبىلىپ جۇرگەن سوڭ، بالامنان «سەن وعان جاقسى سەرىك بولا الاسىڭ با؟ ەكەۋىڭنىڭ ارالارىڭدا بالالار بار. بالا دەگەن ويىنشىق ەمەس. سول سەبەپتى، سەندەردىڭ ءبىر-بىرلەرىڭە دەگەن سەنىمدەرىڭ ورنىقتى ما؟»  دەگەن سەكىلدى سۇرادىم. بۇل ساۋالدى اناسى دا قويعان بولاتىن. بالامىزعا شەكتەۋ قويا المايمىز. ءومىر سولاردىكى. اقىرى اقبوتانى ۇيگە الىپ كەلىپ تانىسپاق بولدىق. وسىلايشا بالامىزدىڭ ايتقان تىلەگىن ورىنداۋىمىزعا تۋرا كەلدى»، - دەيدى ءانشىنىڭ قايىن اتاسى تىلەگەن داۋلەتوۆ.