نۇرسۇلتان نازاربايەۆ: اجىراسۋدىڭ كوبەيىپ كەتكەنى جانىمدى جابىرقاتىپ وتىر
«سەنىم - بۇل عىلىمي، فيلوسوفيالىق دۇنيە. سەنىم بار بولسا، سويلەسۋگە، دوستاسۋعا بولادى. سەنىمسىز وتباسىنىڭ ءومىر ءسۇرۋى مۇمكىن ەمەس. سەنىم بولماسا، وتباسى ويران بولادى. ەلىمىزدە اجىراسۋلاردىڭ كوبەيىپ كەتكەنى جانىمدى جابىرقاتىپ وتىر. مەن ءبارىن دە بىلەمىن، قولىمدا مالىمەت بار. ۇيلەنىپ جاتقان جاستاردىڭ تورتتەن ءبىرى 1-2 جىلدىڭ كولەمىندە اجىراسىپ كەتۋدە. نەگە ولاي بولىپ جاتىر؟ بىرىنشىدەن، ۇيلەنۋگە اسىعادى. الدىمەن، ادامدى تولىق تانىپ، ونىڭ وتباسىندا، دوستارىنىڭ اراسىندا، قوعامدا قانداي ەكەنىن ءبىلىپ الۋ دەگەن جوق. ءبىراق ءتوزىم جەتپەيدى. جالپى سىرتقى جۇمىس تەك بي ءۇشىن قاجەت. ال ناعىز سۇلۋلىق - ول ادامنىڭ جانى»، - دەپ اتاپ ءوتتى مەملەكەت باسشىسى.
بۇدان وزگە، نۇرسۇلتان ءابىش ۇلى ايەلدەر پسيحولوگياسىنا دەگەن كوزقاراسىن ءبىلدىردى.
«ايەلدى تۇسىنە ءبىلۋ قاجەت. ولار بىزگە قاراعاندا وزگەشە جاراتىلعان. ولار باسقاشا ويلايدى، جالپى ميلارى وزگەشە قۇرىلعان. كەيدە ولاردى دا تىڭداعان دۇرىس. ايەل ءبىر رەت سەنىڭ ايتقانىڭدى ورىنداۋ ءۇشىن، سەن ونى ون رەت تىڭداۋىڭ قاجەت. «ناعىز ەركەك» دەگەن ءسوز تىركەسى بار. ءبىز ءبارىمىز دە ناعىز ەرمىز. بۇل تىركەستى ايەلدەر كۇيەۋلەرىن قورقىتۋ ءۇشىن ويلاپ تاپقان»، - دەپ ءتۇسىندىردى پرەزيدەنت.
«بەرىك وتباسى - بارلىق نارسەنىڭ نەگىزى. ەڭ باستىسى - ءتوزىم. بار كۇيدە قابىلداپ ۇيرەنىپ، توزە ءبىلۋ قاجەت. بىردەن جۇدىرىق الا جۇگىرىپ نە ىدىس سىندىرۋدىڭ قاجەتى جوق. كەرىسىنشە جاستارعا وتباسىلىق ومىردە سابىرلى بولۋ كەرەكتىگىن ۇقتىرعانىمىز ءجون. بالا پايدا بولعان سوڭ، ادامنىڭ مىندەتتەرى دە ارتادى. بالالارعا دا توزە ءبىلۋ كەرەك، ءبىر-بىرىنە دە شىداۋ كەرەك»، - دەپ اتاپ ءوتتى نۇرسۇلتان نازاربايەۆ.
پرەزيدەنت گارۆارد ۋنيۆەرسيتەتىندە جۇرگىزىلگەن زەرتتەۋدى مىسالعا كەلتىردى.
«ادامنىڭ باقىتى نەدە؟ ءدال وسى سۇراقتى ون مىڭ ادامعا قويىپتى. ءبىرىنشى ورىندا - بالالار، ەكىنشى ورىندا - دوستار، ال ءۇشىنشى ورىندا ادامداردىڭ ءبىر-بىرىمەن تىلدەسۋى مەن جاقسىلىق جاساۋى. ياعني ەشكىممەن ارالاسپايتىن جالعىز ادام باقىتتى بولا المايدى»، - دەپ ءتۇسىندىردى ەلباسى.
ءسوز سوڭىندا مەملەكەت باسشىسى ءمىنسىز جۇباي ىزدەۋ تۋرالى انەكدوت ايتتى:
«ءبىر باي ۇيلەنگىسى كەلىپ، وزىنە ءمىنسىز ايەل ىزدەپتى. ءبىراق سول كۇيى تاپپاستان، قارتتىعىن جالعىز قارسى الىپتى. وقۋشىلارى ودان: «سەن سونداي داناسىڭ، نەگە ايەلسىز قالدىڭ؟»، - دەپ سۇراسا: «مەن ءمىنسىز ايەل ىزدەگەن ەدىم. كۇندەردىڭ كۇنىندە ءوزىم ۇناتقان سۇلۋدى تاپتىم. ءبىراق ول اقىلسىز بولىپ شىقتى. كەيىن اقىلدى ايەلدى كەزىكتىردىم. ءبىراق دوستارىم: «سەن وسىعان ۇيلەكبەكسىڭ بە؟» - دەپ رايىمنان قايتاردى. اقىرىندا اقىلى كوركىنە ساي ارۋدى جولىقتىردىم»، - دەگەن ەكەن. «ەندەشە نەگە ۇيلەنبەدىڭ؟» - دەسە قارت: «سەبەبى ول دا ءمىنسىز كۇيەۋ ىزدەپ جۇرگەن ەكەن»، - دەپ جاۋاپ بەرىپتى».
