اتىراۋلىق سپورتشى ەكى اياعىنان قالاي ايىرىلعاندىعىن ايتىپ بەردى - فوتو

استانا. قازاقپارات - اتىراۋدا ەكى اياعى بولماسا دا، حالىقارالىق دارەجەدەگى سپورت شەبەرى، ەكى بالانىڭ اكەسى بولعان رۋحتى ازامات قۋانىش تاجىكوۆ تۇرادى، دەپ حابارلايدى قازاقپارات اق جايىققا سىلتەمە جاساپ.
None
None

اتالعان باسىلىمعا قۋانىش تاجىكوۆ ەكى اياعىنان قالاي ايىرىلعاندىعىن ايتىپ بەردى.

«بۇل 1997 -جىلى بولدى. مەنىڭ جاسىم 11 دە ەدى. ءبىز «سترويكونتورادا» تۇردىق. بالالارمەن بىرگە جاقىن ماڭداعى اتىراۋ مۇناي وڭدەۋ زاۋىتىنا (ا م و ز) قاتىنايتىن پويىزدارعا ءمىنىپ، ويناعاندى جاقسى كورەتىنبىز. سول كۇنى زاۋىتقا كەتىپ بارا جاتقان، وتكەلدە تۇرعان پويىزدىڭ سوڭعى جاعىنداعى تسيستەرنالارىنىڭ بىرىنە سەكىرىپ ءمىنىپ، بىرگە قوزعالماقشى بولىپ، ءىلىنىپ الدىم. ءبىر كەزدە پويىز كەرىسىنشە ارتقا قاراي ءجۇرىپ، اياعىم تايىپ كەتتى دە، مەن استىنا ءتۇستىم. بىرنەشە تسيستەرنا اياقتارىمدى ەزىپ، لەزدە وتە شىقتى. «كومەكتەسىڭدەر!» دەپ ايقايلاۋعا عانا شامام كەلدى. ءبىراز جەرگە دەيىن جىلجىپ بارعان پويىزدان سەكىرىپ تۇسكەن ماشينيست ماعان قاراي جۇگىردى. جىلاپ، بىردەڭەلەردى ايتىپ جاتتى. مەنى كوتەرىپ الىپ، كولىك جۇرەتىن جولعا دەيىن اكەلدى دە، تاكسيگە وتىرىپ، اۋرۋحاناعا اپاردى...



اۋىرسىنعانى ءوز الدىنا، مۇنى ەستىگەندە اكە-شەشەمنىڭ ۇرىساتىنىن ويلاپ، قاتتى قورىقتىم. «پاپا- ماماما ايتپاڭىزشى!» دەپ ماشينيستتەن وتىنگەنىمدى بىلەمىن. ءالسىن-ءالسىن ەسىمدى جوعالتتىم. ءبىر ويانعانىمدا «جەدەل جاردەمدە» كەلە جاتقانىمدى، ەندى ءبىر ەسىمدى جيعاندا اۋرۋحانانىڭ جان ساقتاۋ بولىمىندە جاتىر ەكەنمىن. پالاتانىڭ تەرەزەسىنەن قاراپ، اعىل- تەگىل جىلاپ تۇرعان اكە- شەشەمدى كوردىم، ار جاعى ەسىمدە جوق.

اۋرۋحانادا باقانداي التى اي جاتتىم. «اياعىم قايدا؟» دەپ، بىرنەشە رەت مەدبيكەلەر مەن دارىگەرلەرگە شۋ شىعارعان كۇندەرىم دە كوپ بولدى...»، - دەپ ەسكە الادى سپورتشى.

جارتى جىلدى اۋرۋحانادا وتكىزگەسىن، ويىن بالاسى ول جەردەن ارباعا تاڭىلعان كۇيدە بالالىقپەن ءبىرجولاتا قوش ايتىسىپ شىعادى. ال كەلەسى جىلى الماتىدان پروتەز جاساۋمەن اينالىساتىن ماماندار كەلىپ، جاساندى اياق جالعاپ بەرىپ كەتەدى.

2006 -جىلدىڭ مامىرىندا اتىراۋ قالالىق جۇمىسپەن قامتۋ بولىمىندەگىلەر قۋانىشتىڭ اكە- شەشەسىنىڭ ۇيىنە تەلەفون شالىپ، 1 -ماۋسىم - بالالاردى قورعاۋ كۇنىنە وراي مۇگەدەكتەر اراسىندا «مۇنايشى» سپورت كەشەنىندە سپارتاكيادا ۇيىمداستىرىلىپ جاتقانىن ايتىپ، سوعان قۋانىشتى قاتىسۋعا ۇسىنىس جاسايدى. كەلىسىم بەرگەن ەرتەسى كۇنى ماماندار اۆتوكولىكتەرىمەن كەلىپ، ونى «مۇنايشى» سپورت كەشەنىنە اپارادى. بۇل جەردە قۋانىش العاش رەت ءوزى سەكىلدى مۇمكىندىگى شەكتەۋلى ادامدارمەن ۇستەل تەننيسىنەن سايىسقا ءتۇسىپ، ءى ورىندى جەڭىپ الادى. ءسويتىپ ونىڭ سپورتتىق ءومىرى باستالادى.

«ءبىر كۇنى ق ر ەڭبەگى سىڭگەن جاتتىقتىرۋشى، ق ر باس باپكەرى باۋىرجان تاحاۋوۆ جانىما كەلىپ، اتىراۋدا مۇگەدەكتەر اراسىندا ۆولەيبولدى وتىرىپ ويناۋدان سەكسيا بارىن ايتىپ، قاتىسۋعا شاقىردى. مەن بىردەن كەلىسىمىمدى بەردىم. جاتتىعۋعا كەلگەن جىگىتتەردىڭ باستاپقىدا اياق- قولى ساۋ بولىپ كورىندى ماعان، تەك كيىنىپ-شەشىنەتىن ورىننان اياقسىز شىعىپ جاتتى. ولارمەن تانىستىم. العاشقى كۇننەن- اق جاتتىعۋ ۇناعاسىن، ۇزبەي قاتىناسىپ ءجۇردىم، ۇستاز ەڭبەگىنە داق تۇسىرمەۋگە تىرىستىم»، - دەيدى قۋانىش.

قۋانىشتىڭ ىشتەي وزىنە بەرگەن سەرتى ونىڭ ومىرگە دەگەن كوزقاراسىن تۇبەگەيلى وزگەرتتى. ول سول 2006 -جىلى اتىراۋدا مۇگەدەكتەر اراسىندا وتكەن قازاقستان چەمپيوناتىنا قاتىسىپ، التىن القانى كوماندا مۇشەلەرىمەن بولىسەدى. كەلەسى جىلى بۇل كوماندا تالدىقورعان قالاسىنداعى پاراليمپيادالىق ويىنداردا  Ⅱ ورىن الىپ، برازيليانىڭ ريو- دە- جانەيرو قالاسىندا جاستار اراسىندا وتكەن الەم چەمپيوناتىنا جونەلەدى.

«بۇل مەنىڭ شەتەلگە العاش شىعۋىم ەدى. ودان كەيىن وسى سپورتقا كەلۋىمنىڭ ارقاسىندا پولشا، قىتاي، رەسەي جانە باسقا دا ەلدەرگە سپورتشىلارمەن تۋرنيرلەردە سايىسقا ءتۇسىپ جۇردىك. ال سپورتقا كەلمەس بۇرىن بۇل مەنىڭ تۇسىمە دە كىرمەگەن ەدى. ءبىز ريو- دە- جانەيرو قالاسىنداعى تۋرنيردە سوڭعى ورىندى يەلەندى. ءبىراق، جەڭىس پەن جەڭىلىستىڭ قاتار جۇرەتىنىن ءبىز بىلەمىز»، - دەيدى ول.

قۋانىش بولاشاق جارى ىڭكارمەن وسى «مۇنايشى» سپورت كەشەنىندەگى جاتتىعۋ زالىندا تانىسادى. ىڭكار ول كەزدە تاەكۆاندو سەكتسياسىنا قاتىسىپ جۇرگەن.



قۋانىش تەك سپورتشى عانا ەمەس، اربادا وتىرىپ بيلەۋدەن دە الدىنا جان سالمايدى. شىمكەنتتە اكىم كۋبوگى ءۇشىن وتكەن رەسپۋبليكالىق جارىستا ءى ورىندى، پاۆلودار قالاسىنداعى پاراليمپيادادا Ⅱ ورىندى جەڭىپ الادى. ال سانكت- پەتەربۋرگتە حالىقارالىق پاراليمپيادالىق كوميتەتتىڭ قولداۋىمەن 18 ەلدەن قاتىسقان مۇگەدەك سپورتشىلار اراسىندا اربا ۇستىندە سپورتتىق بيلەۋدەن وتكەن الەم كۋبوگىندە يتاليادا وتەتىن الەم چەمپيوناتىنا قاتىسۋ قۇقىعىن جەڭىپ الادى. ءبىراق، قۋانىش ول جارىسقا قاتىسپايدى، ونىمەن تۇسپا-تۇس كەلگەن وتىرىپ ويناۋ ۆولەيبولىنان وتەتىن جارىستى تاڭدايدى.



«مەن سپورتسىز وتىرا المايمىن عوي. قازىر تاپانشامەن اتۋدى ۇيرەنىپ ءجۇرمىن. ودان اعزاعا كۇش تۇسپەيدى. قىركۇيەكتىڭ اياعىندا رەسپۋبليكالىق جارىس وتەدى. بۇل ءتورت جىلدا ءبىر رەت وتەتىن سپارتاكيادا. سوندىقتان مەن بۇل جارىستان قالايدا 1- ورىن الۋىم كەرەك. جانە ءوزىمنىڭ ۆولەيبول كومانداما قايتا ورالۋىمدى اسىعا كۇتىپ ءجۇرمىن» - دەيدى سپورتشى.



بۇگىندە قۋانىش پەن ىڭكار قادىرجان، سۇڭقار ەسىمدى سۇيكىمدى ۇلدارىن تاربيەلەپ، ءوسىرىپ وتىر.

سوڭعى جاڭالىقتار