جامبىل ءوڭىرىنىڭ دامۋى بۇرىنعىمەن سالىستىرعاندا جەر مەن كوكتەي - ق ر پرەزيدەنتى

تاراز. قازاقپارات - جامبىل ءوڭىرىنىڭ دامۋى بۇرىنعىمەن سالىستىرعاندا جەر مەن كوكتەي. مۇنداي پىكىردى بۇگىن جامبىل وبلىسىنىڭ جۇرتشىلىعىمەن كەزدەسۋ بارىسىندا ەلباسى نۇرسۇلتان نازاربايەۆ ايتتى،

 دەپ حابارلايدى قازاقپارات.

«وسى كەزدەردە ەلدى ارالاپ، وڭىرلەردىڭ جاعدايىمەن تانىسىپ، ەلدىڭ ويىن ءبىلۋ مەن ءۇشىن سالتقا اينالعانىن بىلەسىزدەر. سول جولمەن وزبەكستان، تۇرىكمەنستانعا ساپارىمنان كەلە جاتقاندا جولشىباي سىزدەرگە سوعىپ، جاعدايدى بىلەيىن دەپ كەلدىم. بۇگىن قالانى ارالاپ، جاسالىپ جاتقان جۇمىستاردى كوردىك»، - دەدى ەلباسى.

قازاقستان پرەزيدەنتى جامبىل وبلىسى ءوندىرىس وشاقتارىن كوبەيتۋى قاجەتتىگىن باسا ايتتى. ءوندىرىس وشاقتارىنىڭ سانى ارتسا، ەكونوميكانىڭ اۋقىمى ەسەلەنىپ، بيۋدجەتكە تۇسەتىن قاراجاتتىڭ مولاياتىندىعىن، حالىقتىڭ جاعدايى جاقساراتىندىعىنا نازار اۋدارتتى. «نۇرلى جەر» باعدارلاماسى اياسىندا جاڭادان مولتەك اۋداندار سالىنىپ جاتقانىن كورىپ وتىرمىن. جول سالىنىپ جاتىر. جامبىلدىڭ ۇستىمەن قازىر باتىس ەۋروپا- باتىس قىتاي كولىك ءدالىزى سالىندى. تەمىر جول بار، گاز قۇبىرى تارتىلىپ، بارلىعى گازداندىرىلدى. بۇرىنعىمەن سالىستىرعاندا جەر مەن كوكتەي بولدى. تارازدىڭ ىشىندەگى ماشينالاردىڭ سانىن قاراساڭ، سونىڭ ءوزى حالىقتىڭ ءال- اۋقاتىنىڭ كوتەرىلگەندىگىن بىلدىرەدى. سونىڭ بارلىعى ەلدىڭ ىشىندەگى تىنىشتىقتىڭ، ءبىزدىڭ اۋىزبىرشىلىگىمىزدىڭ ارقاسىندا بولىپ وتىر. ارينە، وبلىستا جۇمىستار جاسالىپ جاتىر. اكىمدىكتەر وزدەرىنىڭ جۇمىستارىن اتقارۋدا. ءبىراق ىستەيتىن شارۋالار دا كوپ»، - دەدى نۇرسۇلتان نازاربايەۆ.

 وسىدان كەيىن ءوڭىر باسشىسى كارىم كوكىرەكبايەۆ جامبىل وبلىسىنىڭ دامۋى جايىندا بايانداما جاسادى.

 اۆتور: مارلان جيەمباي