لاتىن الىپبيىنە ءوتۋ ماسەلەسىن دۇرىس تۇسىنگەن ءجون - نازاربايەۆ

استانا. قازاقپارات - مەملەكەت باسشىسى جامبىل وبلىسىنداعى جۇمىس ساپارى اياسىندا وبلىستىق قازاقستان حالقى اسسامبلەياسى ورنالاسقان "دوستىق ءۇيىنىڭ" جاڭا عيماراتىن ارالاپ كوردى. نۇرسۇلتان نازاربايەۆ جامبىل وبلىسىنىڭ ەتنومادەني بىرلەستىكتەرىنىڭ وكىلدەرىمەن اڭگىمەلەستى.

«مەن سىزدەرگە وزبەكستان مەن تۇرىكمەنستانعا ساپارلارىمنان سوڭ كەلىپ وتىرمىن. ءبىزدىڭ كەزدەسۋلەرىمىز بەن ۋاعدالاستىقتارىمىزدىڭ ناتيجەسىندە وسىعان دەيىن بولعان كەدەرگىلەردىڭ بارلىعى الىنىپ تاستالدى. بۇگىندە جاقىن كورشىلەرىمىزبەن ءتيىمدى ىنتىماقتاسۋ ءۇشىن بارلىق جاعداي جاسالعان»، - دەدى قازاقستان پرەزيدەنتى.

ەلباسى «بولاشاققا باعدار: رۋحاني جاڭعىرۋ» اتتى ماقالاسىنىڭ وزەكتى تۇستارىنا ەرەكشە توقتالدى. "سانامىزدى جاڭعىرتۋ - قوعام ءۇشىن قاي كەزدەگىدەن وتكىر ماسەلە بولىپ تۇر. اقپاراتتىق- سيفرلىق زاماندا ءبىر ورىندا تۇرۋعا بولمايدى، بۇگىنگى تالاپتار مەن جاعدايعا سايكەس جەتىلىپ، وزگەرىپ وتىرۋ قاجەت. ادامدارمەن بىرگە بۇكىل قوعام دا باسەكەگە قابىلەتتى بولۋعا ءتيىس»، - دەپ تۇيىندەدى مەملەكەت باسشىسى.

سونداي-اق، نۇرسۇلتان نازاربايەۆ قازاقستان حالقى اسسامبلەياسىنىڭ بىرەگەيلىگىنە جانە مەملەكەتتىك ءتىلىمىزدىڭ لاتىن الىپبيىنە كوشۋىنىڭ ماڭىزدىلىعىنا نازار اۋداردى.

«مەن تۇراقتىلىق پەن حالقىمىزدىڭ بىرلىگى دامۋىمىزدىڭ كەپىلى بولىپ سانالاتىنىن ءاردايىم ايتىپ جۇرەمىن. لاتىن الىپبيىنە ءوتۋ ماسەلەسىن دۇرىس تۇسىنگەن ءجون. ءتىل حالقىمىزدى ودان ءارى بىرىكتىرۋ ءۇشىن جەتەلەۋگە ءتيىس»، - دەپ قورىتىندىلادى قازاقستان پرەزيدەنتى. سوڭىندا ەلباسى «كونە تاراز» تاريحي- ارحەولوگيالىق ساياباعىنىڭ اۋماعىندا جۇرگىزىلىپ جاتقان ارحەولوگيالىق قازبا جۇمىستارى بارىسىندا تابىلعان ەكسپوناتتاردى كوردى.

ايتا كەتەيىك، بۇگىندە «دوستىق ۇيىندە» 175 قوعامدىق كەلىسىم كەڭەسى، 27 انالار كەڭەسى، 12 اقساقالدار كەڭەسى، 12 مەدياتسيا كابينەتى، قازاقستان حالقى اسسامبلەياسى كافەدراسى، عىلىمي- ساراپتامالىق توپ، قول ونەر شەبەرلەرىنىڭ كلۋبى جانە «اق جەلكەن» جاستار بىرلەستىگى جۇمىس ىستەيدى.