قازاقستاننىڭ ءبيشى قىزدارى قىتاي چەمپيوناتىنىڭ ۇزدىك ۇشتىگىنە ەندى - فوتو

بەيجىڭ. قازاقپارات - بەيجىڭدە سپورتتىق بال بيلەرىنەن وتكەن قىتايدىڭ اشىق كۋبوگىندا قازاقستان وكىلدەرى كاميللا رۋستاموۆا مەن اميرا قابازيەۆالار ءساتتى ونەر كورسەتتى، دەپ حابارلايدى «قازاقپارات» ح ا ا- نىڭ بەيجىڭدەگى ءتىلشىسى.

جارىستارعا قىتايدىڭ بارلىق ءبي مەكتەپتەرىنەن 500-دەن استام بالا قاتىستى.

9 جاسار كاميللا رۋستاموۆا 10 جاسقا دەيىنگى ساناتتا لاتينوامەريكالىق («لاتينو سولو») جانە ەۋروپالىق (ۆالس) باعدارلامالاردا ەكى ءۇشىنشى ورىن يەلەندى. جاتتىقتىرۋشىسى - ماريا ۆلاديميروۆنا. ول بۇعان دەيىن استانادا سپورتتىق گيمناستيكا سەكتسياسىنا قاتىسقان.

ونىڭ قۇرداسى اميرا قابازييەۆا دا لاتينوامەريكالىق («لاتينو سولو») جانە ەۋروپالىق (ۆالس) باعدارلامالاردا ەكى ءۇشىنشى ورىنعا قول جەتكىزدى، ءبىراق 11 جاسقا دەيىنگىلەر ساناتىندا. ول بەيجىڭدە بال بيلەرى سەكتسياسىنا بارىپ جۇرگەنىنە ەكى جىل بولدى. وعان دەيىن قازاقستاندا الما ساعاديەۆنانىڭ جەتەكشىلىگىندەگى «كوبەلەك» انسامبلىندە شىعىس جانە الەم حالقى بيلەرىن ۇيرەنىپ كەلگەن. 2017 -جىلدىڭ قازان ايىندا جاس تالانت نانكيندە وتەتىن سپورتتىق بال بيلەرىنەن حالىقارالىق چەمپيوناتقا قاتىسۋعا نيەتتى.