08:50, 18 - قىركۇيەك 2017 | GMT +6
ازيا ويىندارىنىڭ اشىلۋ سالتاناتىندا قازاقستان تۋىن نۇرلان مىرزابايەۆ الىپ شىقتى
استانا. قازاقپارات - تۇرىكمەنستان استاناسى اشحاباد قالاسىندا جاۋىنگەرلىك ونەر تۇرلەرى بويىنشا جابىق عيماراتتا وتەتىن V ازيا ويىندارىنىڭ اشىلۋ سالتاناتىندا قازاقستان تۋىن تاەكۆوندوشى نۇرلان مىرزابايەۆ الىپ شىقتى، دەپ حابارلايدى قازاقپارات ءتىلشىسى.
سونىمەن قاتار دەلەگاتسيانى سپورت كوميتەتىنىڭ باسشىسى ەلسيار قاناعاتوۆ باستاپ ءجۇردى. اتالعان دودانىڭ رەسمي اشىلۋ سالتاناتى 45 مىڭ ادامعا ارنالعان ورتالىق ستاديوندا ءوتتى. وعان ق ر پرەزيدەنتى نۇرسۇلتان نازاربايەۆ ارنايى بارىپ قاتىستى. سونداي-اق، ەلباسى قازاقستاندىق سپورتشىلارمەن كەزدەسىپ، ولارعا ساتتىلىك تىلەدى. جالپى، اشحاباد قالاسىندا جابىق كەشەندەگى ازيا ويىندارىندا قازاقستان نامىسىن 16 سپورت ءتۇرى بويىنشا 181 سپورتشى قورعايدى.
اۆتور: كۇنسۇلتان وتارباي
