شىمكەنتتە ەلىمىزدە بالاماسى جوق بوكس ورتالىعى سالىنىپ جاتىر - فوتو
N5 بوكس سپورت مەكتەبىنىڭ جانىنان سالىنىپ جاتقان نىساندى شاھار باسشىسى عابيدوللا ءابدىراحىموۆ ارالاپ كوردى، دەپ حابارلايدى قازاقپارات ح ا ا ءتىلشىسى.
بۇگىنگى تاڭدا جاڭا عيماراتتىڭ قۇرىلىس- مونتاج جۇمىستارى اياقتالدى. سپورت مەكتەبىنىڭ 2 قاباتتى اكىمشىلىك عيماراتى مەن 210 ورىندى جاڭا سپورت زالى پايدا بولدى.
«بۇل - بىرەگەي جوبا. مۇنداي ورتالىق قازاقستاننىڭ باسقا ەش جەرىندە جوق. ءيا، زالدار بار، جارىسقا ارنالعان ورىندار بار، دەگەنمەن، العاش بولىپ ءبىزدىڭ قالامىزدا تۇتاس كەشەن سوعىلىپ وتىر. ەندى ءبىزدىڭ مەكتەبىمىزدە حالىقارالىق وقۋ جيىندارىن دا وتكىزۋگە بولادى. بارلىق جاعداي جاسالعان»، - دەدى قالالىق N5 بوكس سپورتى مەكتەبىنىڭ ديرەكتورى زاڭعار قاسقايەۆ.
ەندى قۇرىلىسشىلار وزگە ايماقتاردان كەلەتىن سپورتشىلار ءۇشىن جاتاقحانا سالۋ ۇستىندە. سونداي- اق بوكس مەكتەبىنىڭ ەسكى عيماراتى دا جوندەلۋدە، مەكتەپتىڭ جارىقتاندىرىلۋى دا ءوز دارەجەسىندە بولماق.
ايتا كەتەيىك، قازاقستان بوكس فەدەراتسياسىنىڭ اتقارۋ بيۋروسى 2017 -جىلى تۋعان ەرلەر اراسىنداعى ەل چەمپيوناتىن وتكىزۋگە وتىنىشتەردى قاراي كەلە، بۇل قۇقىقتى ءبىراۋىزدان شىمكەنتكە بەرىپ وتىر. چەمپيونات 6-12 -قاراشا ارالىعىندا شىمكەنت قالاسىندا وتەدى دەپ حابارلايدى ق ب ف سايتى. بۇعان دەيىن بۇل جارىستى ءداستۇرلى تۇردە جەڭىل اتلەتيكا مانەجىندە وتكىزۋ جوسپارلانعان ەدى. دەگەنمەن، بوكس ورتالىعى قوناقتاردى كاسىبي دەڭگەيدە قابىلداۋعا دايىن بولعاندىقتان، ەل چەمپيوناتى بوكس مەكتەبىنىڭ جاڭا عيماراتىندا ءوتۋى مۇمكىن. و ق و بوكس فەدەراتسياسىنىڭ وكىلدەرى ورتالىقتىڭ مۇمكىندىكتەرىن باعالاپ ۇلگەردى.
