فوتو رەپورتاج: كەيكى باتىر رۋحىنا ارنالعان قازاق كۇرەسى جارىسى اياقتالدى

قوستاناي. قازاقپارات - قوستاناي وبلىسىندا كەيكى باتىر سۇيەگىن جەرلەۋ ءراسىمى قۇرمەتىنە وراي قازاق كۇرەسىنەن «تۇيە پالۋان» جارىسى وتكىزىلدى، دەپ حابارلايدى قازاقپارات ءتىلشىسى.

 كەيكى باتىر كەسەنەسى ورنالاسقان امانگەلدى اۋدانىنا قاراستى تاستى اۋىلىندا قازاق كۇرەسىنەن رەسپۋبليكالىق جارىس ۇيىمداستىرىلدى. پالۋاندار دوداسىنا ەلىمىزگە تانىمال الىپتار جيىلدى.

«قازاقستان بارىسى» تۋرنيرىنىڭ 2014 -جىلعى جەڭىمپازى مۇحيت تۇرسىنوۆ ءبىرىنشى كەزدەسۋىندە جانكەلدين اۋدانىنىڭ پالۋانىن ايقىن باسىمدىقپەن ۇتتى. سونان سوڭ استانالىق تاجىريبەلى سپورتشى، دزيۋدودان ەلىمىزدىڭ بىرنەشە دۇركىن چەمپيونى سەرگەي پاكتى تىزە بۇكتىردى. ال تاعى ءبىر توپجارعان پالۋان ايبات سەيتەن العاشقى اينالىمنان سۇرىنبەدى. ەكىنشى كەزەڭدە وعان گرەك- ريم كۇرەسىنەن ازيا چەمپيونى تالعات جيەنتايەۆ قارسى تۇردى. دەگەنمەن، تالاي دودانىڭ شاڭىن قاققان ايبات سەيتەن قارسىلاسىن الىپ ۇردى.

 «ارقالىق بارىسى» عابيت بالعىنبايەۆ تا بابىندا ەكەنىن كورسەتتى. ول دا باستاپقى قارسىلاستارىن ايقىن ۇتىپ، جارتىلاي فينالعا شىقتى. عابيت بوز كىلەم يەسى، امانكەلدىلىك رىسبەك داۋىتپەن كەزدەستى. بۇل جولى دا ارقالىقتىق جىگىتتىڭ باعى جاندى. جۇرتشىلىق مۇحيت تۇرسىنوۆ پەن ايبات سەيتەننىڭ كۇرەسىن كۇتكەن- ءدى. وسىلاي سىرالعى قارسىلاستار تاعى جولىقتى. بىرگە جاتتىعىپ جۇرگەن بىلەكتىلەردىڭ ءباسى ايباتتىڭ پايداسىنا شەشىلدى. ءۇشىنشى ورىن ءۇشىن وتكەن كەزدەسۋدە مۇحيت تۇرسىنوۆ رىسبەك ءداۋىتتى جەڭدى.

 بىرىنەن- ءبىرى اسقان ساقا پالۋانداردىڭ اراسىنان ارقالىق قالاسىنان كەلگەن عابيت بالعىنبايەۆ وزدى. ول ايبات سەيتەندى ۇپاي سانىمەن ۇتىپ، «تۇيە پالۋان» اتاندى. وسىلايشا، امانكەلدى اۋدانىنىڭ اكىمى نۇرجان وتەگەنوۆ جارىس جەڭىمپازى عابيت بالعىنبايەۆقا اۆتوكولىكتىڭ كىلتىن تاپسىردى.

باتىر جولاي ۇلى