قولمەرگەن كەيكى باتىر سۇيەگىنىڭ ەلگە ورالۋى سانامىزدىڭ جاڭعىرعانىن كورسەتەدى - قۋانىش سۇلتانوۆ
باس قوسۋعا ق ر مەملەكەتتىك حاتشىسى گۇلشارا ءابدىقالىقوۆا، ق ر مادەنيەت جانە سپورت ءمينيسترى ارىستانبەك مۇحامەدي ۇلى، قوستاناي وبلىسىنىڭ اكىمى ارحيمەد مۇحامبەتوۆ، ۆەنگريانىڭ قازاقستانداعى ەلشىسى اندراش باراني، ق ر پارلامەنتىنىڭ دەپۋتاتى قۋانىش سۇلتانوۆ جانە باسقا دا زيالى قاۋىم وكىلدەرى قاتىستى.
كونفەرەنسيانى قوستاناي وبلىسى اكىمى جۇرگىزىپ وتىردى. ق ر مەملەكەتتىك حاتشىسى گۇلشارا ءابدىقالىقوۆا ءوزىنىڭ كىرىسپە سوزىندە ەلىمىزدە رۋحاني باعىتتا جۇزەگە اسىرىلىپ جاتقان شارالاردىڭ ماڭىزىنا توقتالدى.
«كەيكى كوكەمباي ۇلى - بولمىسى بولەك باتىر. حالىقتىڭ جوعىن جوقتاپ، ادىلدىك پەن پاراساتتىڭ اق تۋىن كوتەرگەن بابامىز ار-نامىستى بارىنەن بيىك قويعان. مەملەكەت باسشىسىنىڭ «رۋحاني جاڭعىرۋ: بولاشاققا باعدار» اتتى باعدارلامالىق ماقالاسىندا تاريحتىڭ ساباعىنان نار الۋىمىز كەرەكتەگىن باسا ايتتى. مىنە، وسى باعىتتا قاسيەتتى قوستاناي وڭىرىندە ءبىرشاما شارۋالار اتقارىلۋدا. وعان ءبارىمىز كۋامىز. وسى ىستەرىڭىز جالعاسا بەرسىن»، - دەگەن تىلەك ايتتى مەملەكەتتىك حاتشى.
ۆەنگريانىڭ قازاقستانداعى ەلشىسى اندراش باراني قازاقستان مەن ۆەنگريانىڭ تاريحي بايلانىسى جونىندە ايتتى. ەلشى سوزىنە سۇيەنسەك، الداعى ۋاقىتتا ەلدىڭ عالىمدارى بىرىگىپ، بىرنەشە جوبانىڭ ورىندالۋىنا مۇرىندىق بولادى.
ق ر مادەنيەت جانە سپورت ءمينيسترى ارىستانبەك مۇحامەدي ۇلى كەيكى باتىردىڭ ءمۇسىنىن قوستاناي وبلىسىنىڭ مۋزەيىنە سىيعا تارتتى. مۇنان سوڭ دەپۋت قۋانىش سۇلتانوۆ بايانداما جاسادى.
«كەيكى باتىر كەسەنەسىنىڭ تۋعان جەرىندە بوي كوتەرۋى - ەلىمىزدىڭ تاريحي تۇلعالارعا دەگەن قۇرمەتىنىڭ كورىنىسى. ەرلىكتىڭ سيمۆولى ىسپەتتەس قولمەرگەن سۇيەگىنىڭ ەلگە ورالۋى دا سانامىزدىڭ جاڭعىرعانى دەپ بىلەمىن. ءيا، قازاقتان باسقا ەشبىر ەل بوداندىقتىڭ زاردابىن وسىنشالىق كورمەگەن شىعار. ال سوناۋ قيىن كەزەڭدەردە باس كوتەرگەن اردا تۇلعالار ار وڭىردە بولدى. تورعاي توپىراعىنان شىققان كەيكى كوكەمباي ۇلىنىڭ ازاتتىق جولىنداعى ەرلىگى ەشقاشان ۇمىتىلمايدى. ونىڭ تاريح بەتىنەن وشىرىلمەۋى دە ءبىزدىڭ قولىمىزدا»، - دەدى قۋانىش سۇلتانوۆ.
ق ر ورتالىق مەملەكەتتىك مۇراجايىنىڭ ديرەكتورى نۇرسان ءالىمباي كەيكى باتىردىڭ باسى ساقتالعان جاشىكتى قوستاناي وبلىسىنا تاپسىردى. كونفەرەنسيادا بەلگىلى اقىن سەرىك تۇرعىنبەك ۇلى مەن كەيكى كوكەمباي ۇلىنىڭ تىكەلەي ۇرپاعى سەيتقالي قوسجانوۆ بايانداما جاسادى.
