الماتىدا اتىشۋلى ماقسات ۇسەنوۆ ەسىرتكىمەن ۇستالدى

استانا. قازاقپارات - تالاي رەت جول اپاتىنا سەبەپكەر بولسا دا، جازادان وڭاي قۇتىلاتىن ماقسات ۇسەنوۆ ەلدى تاعى شۋلاتتى.

ول ەندى ەسىرتكىمەن ۇستالدى دەپ حابارلايدى patrul.kz سايتى.

الماتى قالاسى المالى اۋداندىق سوتىندا اتىشۋلى ۇسەنوۆتىڭ ەسىرتكى پايدالانعانى جونىندە ءىس قارالدى. پوليتسەيلەر ۇسەنوۆتىڭ قالتاسىنان سىرىڭكەنىڭ قورابىنداعى جاسىل، ەرەكشە ءيىسى بار ءشوپتى تاۋىپ العان.

كەيىن مۇنىڭ ماريحۋانا ەكەندىگى بەلگىلى بولدى. سوتتا ۇسەنوۆ ءوزىنىڭ ەسىرتكى شەككەنىن مويىندادى. ول ءوزىنىڭ ماريحۋانانى العاش رەت شەككەنىن ايتىپ، بۇدان بىلاي قايتالاماۋعا ۋادە بەردى.

بارىنەن بۇرىن ۇسەنوۆتىڭ سوتتاعى جاۋابى قىزىق بولدى. ول الماتىداعى مەيرامحانالاردىڭ بىرىندە تۇستەنىپ، كوشەدە جاياۋ سەرۋەندەمەك بولعان. كەنەت اۋەزوۆ كوشەسىنىڭ بويىندا ول جەردە جاتقان سىرىڭكە قورابىن تەۋىپ جىبەرگەن.

سول كەزدە سىرىڭكەنىڭ قورابىنان جاسىل ءتۇستى ءشوپ شىعادى. سودان سوڭ، قوراپتى قالتاسىنا سالىپ، ينتەرنەت كلۋبقا بارعان ول كاسسيرگە اقشا تولەيتىن كەزدە عانا قالتاسىندا ەرەكشە ءشوپتىڭ بارىن ەسىنە ءتۇسىرىپتى.

كەيىن ۇسەنوۆ سىرتقا شىعىپ، ومىرىندە ءبىرىنشى رەت ماريحۋانا شەككەنىن ايتادى. مەديتسينالىق ساراپتاما قورىتىندىسى ۇسەنوۆتىڭ ەسىرتكى قابىلداعانىن راستادى.

سوت ۇسەنوۆ ماقسات قاجىمۇرات ۇلىن كىنالى دەپ تاۋىپ، 453800 تەڭگە كولەمىندە ايىپپۇل سالدى. الايدا، ۇسەنوۆتىڭ ەسىرتكىنى كوشەدە شەككەنىنە دالەل بولماعان سوڭ، سوت قىلمىستىق كودەكستىڭ 296-بابىنداعى ءبىرىنشى بولىگىن قولدانعان جوق.

ەسكە سالا كەتەيىك، ماقساتتىڭ اكەسى قاجىمۇرات ۇسەنوۆ ەكسپو-2017 ۇلتتىق كومپانياسىندا جۇمىس ىستەپ، قارجى جىمقىرعانى ءۇشىن سوتتالعان بولاتىن. الايدا، ءساۋىر ايىندا ول راقىمشىلىققا ىلىگىپ، بوساپ شىقتى.