09:24, 15 - قىركۇيەك 2017 | GMT +6
اتىراۋدا كۇكىرت تۇيىرشىكتەۋ زاۋىتى سالىنادى
اتىراۋ. قازاقپارات - اتىراۋ وبلىسىندا كۇكىرت تۇيىرشىكتەۋ زاۋىتىنىڭ قۇرىلىسى اياقتالۋعا جاقىن. زاۋىتتا قاشاعان كەنىنىڭ مۇنايىن تازارتۋدان الىنعان كۇكىرت وڭدەلەتىن بولادى، دەپ حابار بەرەدى «قازاقپارات» ح ا ا ءتىلشىسى.
«جاڭا نىسان ەكى بولىكتەن تۇرادى، ولار: كۇكىرت وندىرەتىن زاۋىت جانە ءونىمدى ەكسپورتقا شىعاراتىن تەمىرجول كەشەنى. كۇكىرت ءوندىرۋ زاۋىتىندا كۇكىرت الاتىن قوندىرعى، قالدىق گازداردى تازارتۋ قوندىرعىسى، سۇيىق كۇكىرت ساقتالاتىن قويما، كۇكىرت بلوكتارى ساقتالاتىن نىساندار بار. ال تەمىرجول كەشەنىندە تۇيىرشىكتەلگەن كۇكىرتتى ساقتاۋ، ونى تەمىرجول كولىگىنە شىعارۋ ماسەلەلەرى جوسپارلانۋدا. زاۋىتتىڭ وزىندە تاۋلىگىنە 4500 تونناعا دەيىن كۇكىرت ءوندىرۋدى جوسپارلاپ وتىرمىز. تەمىرجول كەشەنى تاۋلىگىنە 7 مىڭ تونناعا دەيىن كۇكىرتتى تاسىمالداۋ قۋاتىنا يە»، - دەيدى «نورت كاسپيان وپەرەيتينگ كومپاني ب. ۆ. » كومپانياسىنىڭ باسقارۋشى ديرەكتورى برۋنو جاردەن.
