نازاربايەۆ ۋنيۆەرسيتەتىنە ءتۇسىرشى دەپ ماعان دا تۋىستارىم كەلەدى - ق ر پرەزيدەنتى

استانا. قازاقپارات - نازاربايەۆ ۋنيۆەرسيتەتىنە ءتۇسىرشى دەپ ماعان دا تۋىستارىم كەلەدى.
None
None

بۇل تۋرالى بۇگىن اقوردادا وتاندىق جانە شەتەلدىك جۋرناليستەرمەن كەزدەسكەن ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.

«بيىل ءبىلىم مينيسترلىگى مەملەكەتتىك گرانتتاردى بولۋدە كوپ بىلىققا جول بەردى. مەملەكەتتىك گرانتقا ىلىككەن بالالار ونى الا الماي قالدى. ودان كەيىن ءبىلىم مينيسترلىگى «التىن بەلگىسى» بار 200 بالانىڭ گرانتىن الىپ قويىپ، ولاردى مەديتسينالىق ۋنيۆەرسيتەتتەردىڭ ەسەبىنەن وقىتامىز دەپ ۋادە بەردى. جەمە-جەمگە كەلگەندە «التىن بەلگى» يەگەرلەرى وزدەرى تاڭداعان ماماندىققا تۇسە المادى. ودان قالدى وزدەرى تاڭداعان ايماققا بارا الماي ۆەتەرينار بولدى، باسقا ايماققا كەتتى. جالپى دەپۋتاتتاردىڭ وزدەرى ءبىلىم مينيسترلىگى بيىلعى ءبىلىم گرانتتارىن زاڭعا قايشى ءبولدى دەۋدە. ءسىز وسىدان حاباردارسىز با؟»، - دەپ سۇراعان ەدى ب ا ق وكىلدەرى ەلباسىنان.

«نەگە ولاي بولدى؟ گرانتتار الۋ ءۇشىن ءتيىستى بال بولۋى كەرەك قوي. ءتيىستى بال الماعاننان كەيىن اناۋ دەپ، مىناۋ دەپ شىعا كەلەمىز. سولاي ءبىلىمدى بولا ما؟ ءار ادام ءوزىنىڭ بىلىمىنە ساي ءوتۋى كەرەك. مىنا نازاربايەۆ ۋنيۆەرسيتەتىنە تۇسەم دەگەن جىل سايىن 10 مىڭ ادام ارىز بەرەدى. 10 مىڭ ادامنىڭ كوپ دەگەندە 450-500 ءى عانا تۇسە الادى. ول جەرگە ەشكىم ارالاسا المايدى. باسقارىپ وتىرعان جاپوننىڭ ازاماتى. بىزدە ادامبىز عوي، ماعان دا تۋعان-تۋىستارىم، دوستارىم كەلىپ: «مىنا جەردە وتىرسىڭ عوي ايتا سالساڭشى» دەيدى. مەن ول جەردە كاتسۋ دەگەن كىسى بار، سونىمەن سويلەس»، دەيمىن دە قويامىن»، - دەپ كۇلدى ەلباسى.

سونىمەن قاتار قازاقستان پرەزيدەنتى عىلىم مەن بىلىمگە كەلگەندە قاتال، تالاپشىل بولۋىمىز كەرەكتىگىن ايتتى.

«بىلىمىمەن تۇسەتىن بولسا سوندا سوڭىندا كەلە جاتقان، مەكتەپتە وتىرعان بالالار «وقۋعا ءتۇسۋ ءۇشىن ناعىز ءبىلىم كەرەك ەكەن عوي»، دەپ ويلانادى. زاڭدى بۇزعان بولسا قارايمىز. زاڭدى تۇرگە كەلتىرەمىز. زاڭدى بۇزباعان بولسا وتكەن بالالار گرانتتى الۋى كەرەك. وتپەگەندەرى المايدى. باسقا دا شارۋا بار عوي. دۇنيەدە ەلدىڭ بارلىعى ۋنيۆەرسيتەت ءبىتىرىپ جۇرگەن جوق. الەم حالقىنىڭ 2 پروتسەنتىنىڭ جوعارى ءبىلىمى بار. قازىر دۇنيەنىڭ جارتىسى ساۋاتسىز»، - دەدى ق ر پرەزيدەنتى.

اۆتور: مارلان جيەمباي

سوڭعى جاڭالىقتار