نۇرسۇلتان نازاربايەۆ: پرەزيدەنتتىڭ جۇمىسى - قول قويۋ نەمەسە بۇيرىقپەن شەكتەلمەيدى

«استانا» تەلەارناسىنىڭ ءتىلشىسى مەملەكەت باسشىسىنىڭ جۇمىس كەستەسى تىم قاۋىرت ەكەنىن، وتكەن اپتادا عانا پرەزيدەنتتىڭ قاتىسۋىمەن «ەكسپو-2017» كورمەسىنىڭ جابىلۋى، ودان كەيىن ي ى ۇ سامميتىنىڭ وتكەنىن، كۇنىنە ەكى جاقتى 8 كەزدەسۋگە قاتىساتىنىن ايتىپ ءوتتى.
«وسىعان قاراماستان ءبىز سىزدەردى وسىندا شاقىردىق. جوق، ازداپ دەمالىپ الۋ ءۇشىن»، - دەپ ازىلدەدى نۇرسۇلتان نازاربايەۆ.
پرەزيدەنتتىڭ سوزىنە سايكەس، ەلگە باسشى بولۋ وڭاي جۇمىس ەمەس. «پرەزيدەنتتىڭ جۇمىسى - قول قويۋمەن نەمەسە بۇيرىقپەن، زاڭمەن نەمەسە كەزدەسۋلەرمەن شەكتەلمەيدى. جۇمىستىڭ 90 پروتسەنتى بۇقارالىق اقپارات قۇرالدارىنا كورىنەتىن اقپاراتتان تىس جاتىر. سىزدەرگە ايتارىم - بۇل اۋىر جۇمىس. ءوز تاجىريبەڭمەن بىرگە، دەنساۋلىقتىڭ مىقتىلىعى مەن قايرات-جىگەردى، پسيحولوگيالىق جانە ەموتسيالىق قۋاتتى تالاپ ەتەدى. ارينە، ءوز قالاۋىڭداعى جۇمىس بولعاندىقتان، بۇل دا كومەك بولا الادى. كونفۋتسيدىڭ «وزىڭە جاعاتىن جۇمىستى تاڭداپ ال - سول كەزدە عانا ءومىر بويى جۇمىس ىستەمەيتىن بولاسىڭ» دەگەن ءسوزى بار ەمەس پە. مۇندا كۇندىز-ءتۇنى تىنىمسىز ەڭبەك ەتۋ كەرەك. البەتتە، وڭاي ەمەس. ءبىراق، مەن ەرتەڭگى كۇندى جوسپارلاپ، وتكىزىپ، سودان كەيىن كەشقۇرىم قۋانۋدى ۇيرەنىپ قالعانمىن. سىزدەر دە سولاي ەتىڭىزدەر»، - دەدى مەملەكەت باسشىسى.