باتىس قازاقستاندا «ازاتتىقتىڭ التىن كۇنى» اتتى اقىندار ايتىسى مارەگە جەتتى

ورال. قازاقپارات - تەرەكتى اۋدانى ورتالىعى فەدوروۆ اۋىلىندا «رۋحاني جاڭعىرۋ» باعدارلاماسى اياسىندا الاشوردا ۇكىمەتىنىڭ 100 جىلدىعىنا ارنالعان «ازاتتىقتىڭ التىن كۇنى» اتتى وبلىستىق اقىندار ايتىسى مارەگە جەتتى، دەپ حابارلايدى «قازاقپارات» ءتىلشىسى.
None
None

دوداعا بارلىعى ون سەگىز اقىن قاتىسىپ، ازاتتىقتى اڭساعان الاش قايراتكەرلەرىنىڭ اتقارعان قىزمەتى مەن تاريحتاعى ورنى، قازىرگى رۋحاني جاڭعىرۋعا بايلانىستى كەلەلى ماسەلەلەردى جىرعا قوستى.

ولاردىڭ اراسىندا رەسپۋبليكالىق سايىستارعا قوسىلىپ، تانىلىپ قالعاندارى، سونىمەن قاتار مەكتەپ قابىرعاسىندا جۇرگەندەر دە بولدى. ايتىس قورىتىندىسىندا قازىلار القاسىنىڭ شەشىمىمەن اقجايىق اۋدانىنىڭ تۇلەگى، قازىر ورالدا تۇراتىن اينابەك بيسەنعاليەۆ باس جۇلدەنى جەڭىپ الدى.

سونداي-اق جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ ماگيسترانتى الشىنبەك مۇقانعاليەۆ ءبىرىنشى، تەرەكتىلىك ەلدار يقسانوۆ پەن بورلىلىك جارقىنبەك شىنتايەۆ ەكىنشى، قاراتوبەلىك رايىمبەك وتەپوۆ، سىرىمدىق باۋىرجان شيرمەدين ۇلى جانە اقجايىقتىق بەكبولات قالەنوۆ ءۇشىنشى ورىنعا يە بولدى.

ايتا كەتەيىك، تەرەكتى اۋدانى سوڭعى جىلدارى ۇلتتىق قۇندىلىقتار مەن ءداستۇرلى ونەردى ناسيحاتتاۋ ماقساتىندا ايتىستى تۇراقتى ۇيىمداستىرىپ كەلەدى.

سوڭعى جاڭالىقتار