ساقالىن بەلىنە ءتۇسىرىپ ءجۇرۋ مۇسىلماندىقتىڭ كادەسى ەمەس - ەلباسى

استانا. قازاقپارات - ساقالىن بەلىنە ءتۇسىرىپ ءجۇرۋ مۇسىلماندىقتىڭ كادەسى ەمەس.
None
None

بۇل تۋرالى بۇگىن اقوردادا وتاندىق جانە شەتەلدىك جۋرناليستەرمەن كەزدەسكەن ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.

«بۇرىن دا ايتقانمىن، قازىر دە ايتايىن. ءبىزدىڭ قازاقتىڭ قىزدارى، جالپى ايەل ازاماتتارى ەش ۋاقىتتا بەتىن بۇركەمەگەن. قىزدارىمىز بۇرىمدارىن سالبىراتىپ، شولپىلارىن سىڭعىرلاتىپ جۇرەتىن. ءبىزدىڭ انالارىمىز باتىر بولعان. ەرلەرىنىڭ جانىندا ءجۇرىپ سوعىسقان، قولىنا نايزا العان. سوندىقتان سونشا عاسىرلىق تاريحىمىزدى الىپ كەلىپ، بۇگىن باسقاشا جولعا تۇسەمىز بە؟ شالداردىڭ شولتيتىپ شالبار كيگەندەرىن قايدان كوردىڭىزدەر؟ ساقالىن بەلىنە ءتۇسىرىپ ءجۇرۋ مۇسىلماندىقتىڭ كادەسى ەمەس قوي. قاي قۇراندا جازىلعان؟ بۇل سالتىمىزدى بۇزادى. مۇندا تۇرعان قانداي ەرەكشەلىك بار؟ وعان كىم قىزىعادى؟ سوندىقتان ول بىزدىكى ەمەس. مەن بۇل تۋرالى ءبىر رەت ايتتىم. مەن ايتقاننان كەيىن ورىنداتاتىن اداممىن. سوندىقتان جاستارعا وسىلاردان اۋلاق بولىڭدار دەيمىن»، - دەدى قازاقستان پرەزيدەنتى.

مۇنان بولەك، نۇرسۇلتان نازاربايەۆ قازىرگى تاڭدا وتانداستارىمىز سوعىسىپ جۇرگەن ايماقتارداعى جاعدايدىڭ وتە اۋىر ەكەنىن باسا ايتتى.

«دۇنيەدە نەشە ءتۇرلى ءدىني اعىمدار بار. سيريادا قاقتىعىستار بولىپ جاتىر. ولار ءار جەردەن جاستاردى شاقىردى، اقشا تولەدى. ولاردى سوعىسقا بەيىمدەپ، سوعىستىردى. سودان كەيىن «ەلدەرىڭە قايتىپ، لاڭكەستىك جاساڭدار» دەپ وعان ۇيرەتىپ جاتىر. بىزدەن دە بارىپ جاتقان ادامداردى بىلەمىن. ول جاستار ءوزىنىڭ ورنىن وسى جەردە تابا الماعان، نە جۇمىسقا ورنالاسپاعان نە ءبىلىم الماعان. انا جاقتا قاراجات تولەيمىز دەگەننەن كەيىن سوعان بارىپ الدانىپ قالادى. سول جاققا وتباسىن دا اپارعاندىقتان ولار كەتە المايدى»، - دەدى مەملەكەت باسشىسى.

اۆتور: مارلان جيەمباي

سوڭعى جاڭالىقتار