كوكپەكتىدەگى قاندى وقيعانى پروكۋراتۋرا باقىلاۋىنا الدى

استانا. قازاقپارات - شىعىس قازاقستان وبلىسىنىڭ پروكۋراتۋراسى كوكپەكتى اۋدانىندا كاسىپكەردىڭ وتباسىنا جاسالعان قاراقشىلىق شابۋىلعا قاتىستى قىلمىستىق ءىستى باقىلاۋىنا الدى، دەپ حابارلايدى «قازاقپارات» ح ا ا ءتىلشىسى.

ەسكە سالا كەتسەك، قايعىلى جاعداي وتكەن اپتانىڭ دەمالىسىندا كوكپەكتى اۋدانىنىڭ كوكپەكتى اۋىلىندا بولدى. ش ق و پروكۋراتۋراسىنىڭ حابارلاۋىنشا، ەكى ەر ادام ساۋدانى سىلتاۋ ەتىپ، دۇكەن يەسىنىڭ ۇيىنە كىرىپ العان. بۇدان كەيىن ەكى جاس جىگىت ءۇيدىڭ يەسى مەن تۋىستارىنا وق اتقان. وق تيگەن كاسىپكەر وقيعا ورنىندا مەرت بولدى. وقتان ءۇيدىڭ وتاناسى دا جارالانعان. ال كاسىپكەردىڭ اكەسى بولسا اياۋسىز سوققىعا جىعىلىپ، اۋرۋحانادا ەس جيماستان كوز جۇمدى.

«شابۋىلداۋشىلار بيزنەسمەننىڭ اناسىن بايلاپ تاستاپ، ۇيدەن 4,5 ميلليون تەڭگە اقشانى الىپ كەتكەن. ءىز جاسىرماس بۇرىن كورپەنى ورتەپ، ءۇي ىشىندەگى گازدى قوسىپ كەتكەن. كاسىپكەردىڭ تۋىسى بايلاۋدان بوساپ شىعىپ، گازدى ءوشىرىپ ۇلگەرگەن. ءسال بولماعاندا گاز جارىلار ەدى»، - دەپ حابارلايدى ۆەدومستودان.

قىلمىستىق ءىستى تەرگەۋ بارىسى بىردەن شىعىس قازاقستان وبلىسىنىڭ پروكۋراتۋراسى مەن شىعىس قازاقستان وبلىسىنىڭ ءى ءى د- ءنىڭ باقىلاۋىنا الىنعان. قازىرگى ۋاقىتتا ىسكە قاتىستى دەگەن كۇدىكپەن ءۇش ادام قاماۋعا الىنعان. قۇزىرلى ۆەدومستۆودان حابارلاعانداي، ەكى ەر اداممەن بىرگە قاراقشىلىققا ءۇشىنشى ادامنىڭ دا قاتىسى بارى انىقتالىپ وتىر. الدىن الا انىقتالعانىنداي، كۇدىكتىلەر قىلمىستى الدىن الا جوسپارلاعان كورىنەدى. ۇستالعانداردىڭ ءبىرى بۇدان بۇرىن ۇرلىق ءۇشىن سوتتالعان. ءىس بويىنشا پروتسەسسۋالدىق پروكۋرور تاعايىندالدى. تەرگەۋ قورىتىندىسى بويىنشا مالىمەتتەر قوسىمشا حابارلانباق.

 اۆتور: ايان بەكەن ۇلى