ون التى مىڭ قازاقستاندىق ازامات اسكەرگە اتتانادى

استانا. قازاقپارات - قورعانىس مينيسترلىگىنىڭ ۇيىتقى بولۋىمەن مەرزىمدى اسكەري قىزمەتكە شاقىرۋدىڭ كۇزگى ناۋقانى باستالدى.

سونىمەن قاتار، اتالعان ۆەدومستۆونىڭ جوعارى اسكەري ينستيتۋتتارىندا اعىمداعى وقۋ جىلى اشىلدى. ەگەر جوسپار ويداعىداي جۇزەگە اسىرىلسا، بيىلعى كۇزدە قارۋلى كۇشتەر مەن وزگە دە اسكەري قۇرىلىمدار قاتارىنا 1990-1999 -جىلدارى ارالىعىندا تۋعان 16 مىڭنان اسا ازامات اسكەرگە اتتانادى.

جىلىنا ەكى رەت ۇيىمداستىرىلاتىن بۇل ۇدەرىس ەلىمىزدىڭ «اسكەري قىزمەت پەن اسكەري قىزمەتشىلەردىڭ مارتەبەسى تۋرالى» قولدانىستاعى زاڭى مەن «اسكەري قىزمەتتىڭ بەلگىلەنگەن مەرزىمىن وتكەرگەن مەرزىمدى اسكەري قىزمەتتەگى اسكەري قىزمەتشىلەردىڭ زاپاسقا بوساتىلۋى جانە قازاقستان رەسپۋبليكاسىنىڭ ازاماتتارىن 2017 -جىلعى ناۋرىز- ماۋسىم جانە قىركۇيەك- جەلتوقسان ايلارىندا مەرزىمدى اسكەري قىزمەتكە كەزەكتى شاقىرۋ تۋرالى» 2017 -جىلعى 16- ناۋرىزداعى پرەزيدەنت جارلىعىنا سايكەس جۇرگىزىلەدى.

سوندىقتان دا، قازاقستان رەسپۋبليكاسى قارۋلى كۇشتەرىنىڭ، باسقا دا اسكەرلەرى مەن اسكەري قۇرىلىمدارىنىڭ اسكەري بولىمدەرى مەن مەكەمەلەرىن جاستارمەن جاساقتاۋ ماقساتىندا اعىمداعى جىلدىڭ 2 قىركۇيەگىنەن شاقىرۋ جانە ولاردى مەديتسينالىق تەكسەرىستەن وتكىزۋ كوميسسيالارى ءوز جۇمىسىن باستادى.

ايتا كەتەيىك، اسكەري بولىمدەر بويىنشا شاقىرىلۋشىلاردى ىرىكتەۋ جانە ءبولۋ كەزىندە الدىن الا زەردەلەۋ ناتيجەلەرى مەن شاقىرىلۋعا دەيىنگى العان بىلىمدەرى ەسكەرىلەتىن بولادى. ال اسكەري بولىمدەردى جاساقتاۋ بەلگىلەنگەن ءتارتىپ بويىنشا جۇزەگە اسىرىلادى. شاقىرىلىم مەن مەديتسينالىق كۋالاندىرۋدى جۇرگىزۋ ءتارتىبى تۋرالى ماسەلەلەردى جەدەل شەشۋ ءۇشىن قورعانىس مينيسترلىگىندە شاقىرىلىم كەزەڭىندە «قاۋىرت جەلى» ىسكە قوسىلادى.

جەلىدە جاۋاپتى لاۋازىمدى تۇلعالار تۇسىندىرمە بەرىپ، ازاماتتاردىڭ ساۋالدارىنا جاۋاپ قايتارىلادى. ەلىمىزدە وقۋ جىلىنىڭ باستالۋىنا وراي، جوعارى بىلىكتى وفيتسەرلەر دايارلايتىن مامانداندىرىلعان اسكەري ينستيتۋتتاردا ءبىلىم بەرۋ جۇيەلى كەستەگە كوشكەن.

قورعانىس مينيسترلىگى ۇسىنعان دەرەكتەرگە سۇيەنسەك، بيىل اتالعان ۆەدومستۆونىڭ جوعارى اسكەري وقۋ ورىندارىنا 600 دەن استام كۋرسانت قابىلدانعان. 1500 ۇمىتكەردىڭ ىشىنەن ىرىكتەلگەن جاس تۇلەكتەر قۇرلىق اسكەرلەرىنىڭ اسكەري ينستيتۋتىندا 14 ماماندىق بويىنشا ءبىلىم الادى.

سونداي-اق، اۋە قورعانىسى كۇشتەرىنىڭ اسكەري ينستيتۋتى 8 ماماندىق، راديوەلەكترونيكا جانە بايلانىس اسكەري- ينجەنەرلىك ينستيتۋتى 5 ماماندىق بويىنشا جوعارى اسكەري كاسىبي ءبىلىم بەرۋ باعدارلاماسى اياسىندا جوعارى بىلىكتى وفيتسەرلەر دايارلاۋدى جۇزەگە اسىرادى.

وقۋ جىلىنىڭ باستالۋىنا وراي، اتالعان اسكەري ينستيتۋتتاردا جاس كۋرسانتتار وقۋعا كىرىستى. ولارعا پروفەسسورلىق- وقىتۋشىلار قۇرام مەن ينجەنەرلىك- تەحنيكالىق قۇرامدارداعى جوعارى بىلىكتى مامانداردان قۇرالعان ۇجىم وكىلدەرى تەوريالىق جانە تاجىريبەلىك ءبىلىم بەرۋدە.

ءبىلىم وردالارى زاماناۋي وقۋ- ماتەريالدىق بازا مەن ءتۇرلى تەحنيكالىق وقىتۋ قۇرالدارىمەن قامتاماسىز ەتىلگەن. سونىمەن قاتار، كۋرسانتتاردىڭ جايلى تۇرمىسى مەن وقۋى ءۇشىن الەۋمەتتىك جاعداي تولىق جاسالعان.

نۇرلىبەك دوسىباي، «ەگەمەن قازاقستان»