تارازدا الەم چەمپيونى فيرۋزا شاريپوۆاعا پاتەر كىلتى تابىستالدى
بۇل تۋرالى جامبىل وبلىسى اكىمدىگىنە سىلتەمە جاساپ «قازاقپارات» ح ا ا ءتىلشىسى حابارلايدى.
ايماق باسشىسى بوكسشىنى كەزەكتى جەڭىسىمەن قۇتتىقتاپ، دەنىنە ساۋلىق، كاسىبي رينگتە جاڭا جەڭىستەرگە جەتە بەرۋىنە تىلەكتەستىك ءبىلدىردى.
«ساتتىلىك اركەز سەرىگىڭىز بولسىن. ءبىز ءسىزدىڭ جەتىستىكتەرىڭىزبەن ماقتانامىز»، - دەگەن كارىم كوكىرەكبايەۆ سپورتشىعا تاراز قالاسىنان ەكى بولمەلى پاتەردىڭ كىلتىن تابىستادى.
وبلىس باسشىسى وسكەلەڭ ۇرپاق اراسىندا پاتريوتتىق رۋح قالىپتاستىرۋ ماقساتىندا تاربيەلىك جۇمىستار اتقارىپ كەلە جاتقان باسقا دا جەتىستىككە جەتكەن جامبىلدىق سپورتشىلاردىڭ، چەمپيوندار مەن جاتتىقتىرۋشىلاردىڭ ەڭبەگىن اتاپ ءوتتى.
جامبىل وبلىسىندا 20 مىڭنان استام سپورتشى جاتتىعاتىن ەكى مىڭنان استام سپورت نىساندارى بار. فيرۋزا شاريپوۆا ايماق باسشىسىنىڭ جىلى قابىلداۋىنا العىسىن ءبىلدىرىپ، جانكۇيەرلەرىن جاڭا جەڭىستەرىمەن قۋانتا بەرەتىندىگىنە سەندىردى.
«مەنىڭ جەڭىسىم - مەنى وسى جەكپە-جەككە دايىنداعان بارلىق كوماندا مۇشەلەرىنىڭ ەڭبەگىنىڭ جەمىسى. الداعى ۋاقىتتا قاراشا-جەلتوقسان ايلارىندا تاعى دا رينگكە شىعۋدى جوسپارلاپ وتىرمىن»، - دەدى سپورتشى.
