ۇكىمەتتىڭ «سيفرلىق قازاقستان» جوباسىندا جاڭا مۇمكىندىكتەرگە نازار اۋدارىلدى - ساعىنتايەۆ
پرەمەر- مينيستر بۇگىن قازاقستان ۇكىمەتى «سيفرلىق قازاقستان» باعدارلاماسى جوباسىن تانىستىرىپ وتىرعاندىعىن ايتتى. «باعدارلامانى دايارلاۋ كەزىندە ۇكىمەت تاراپىنان قازاقستان ەكونوميكاسى ءۇشىن سيفرلىق ءداۋىردىڭ قامتىپ وتىرعان جاھاندىق سىن- قاتەرلەرى مەن مۇمكىندىكتەرى ەسكەرىلدى. وسىعان بايلانىستى ەكى باعىت ايقىندالدى. بىرىنشىدەن، سيفرلاندىرۋ پروتسەسىنىڭ تۇراقتىلىعى ءۇشىن يننوۆاتسيالىق دامۋدىڭ ۇزاق مەرزىمدى ينستيتۋتتارىن قۇرۋ بولسا، ەكىنشىدەن، ناقتى سەكتورداعى بەلگىلەنگەن جوبالاردان تۇراتىن باعدارلامانىڭ پراگماتيكالىق باستالۋىن قامتاماسىز ەتۋ كوزدەلگەن»، - دەپ توقتالدى ول.
وسى ورايدا ول ۇكىمەت 9 بازالىق سالادا ۇدەمەلى سيفرلاندىرۋدىڭ ستراتەگياسىنا ەرەكشە ءمان بەرىپ وتىرعانىن دا اتاپ ءوتتى. بۇل تۇرعىدا ەنەرگەتيكا مەن شيكىزاتقا، اگروونەركاسىپتىك كەشەنگە، ونەركاسىپ، لوگيستيكا مەن اقپاراتتىق تەحنولوگيالارعا ايرىقشا ەكپىن قويىلعان.
«وسى ارقىلى ءبىز ەلباسى الدىمىزعا قويعان ەكى ماقسات- مىندەتتى شەشەمىز. بىرىنشىدەن، ەلدىڭ فلاگماندىق سالالارىنىڭ تەحنولوگيالىق جاڭعىرۋ ءۇشىن تىڭ سەرپىن بەرىلەدى. ەكىنشىدەن، ەڭبەك ونىمدىلىگىنىڭ اۋقىمدى وسىمىنە قاجەتتى جاعداي قالىپتاسادى. اتاپ ايتقاندا، باعدارلامانىڭ باستى ماقساتتارى ايقىندالدى. 2025 -جىلعا قاراي قازاقستان سيفرلىق باسەكەگە قابىلەتتىلىكتىڭ حالىقارالىق رەيتينگىندە 30- ورىندى يەلەنۋى ءتيىس. بۇل ءوز كەزەگىندە ستراتەگيالىق ماڭىزدى كورسەتكىشكە جەتۋگە مۇمكىندىك بەرەدى، ياعني جىل سايىن ەكونوميكالىق ءوسىمنىڭ ۇشتەن ءبىرىن تسيفرلىق ەكونوميكانىڭ ەسەبىنەن قۇرۋعا جول اشادى»، - دەدى ب. ساعىنتايەۆ. ۇكىمەت باسشىسىنىڭ سوزىنە قاراعاندا، سيفرلىق ترانسفورماتسيا باعدارلاماسىندا ءتورت نەگىزگى باعىت قامتىلعان. وسى تۇرعىدا ەكونوميكانىڭ بازالىق سالالارىن تسيفرلاندىرۋ، ءموبيلدى مەملەكەتتى دامىتۋ، كرەاتيۆتى قوعامدى جەتىلدىرۋ، ەلدىڭ تسيفرلىق ترانسفورماتسياسىنا قاجەتتى جاڭا ينفراقۇرىلىمدى قۇرۋ ەسكەرىلىپ وتىر. سونىمەن قاتار ساعىنتايەۆ ۇكىمەت سيفرلىق دامۋ باعىتىنداعى ساياساتتى ۇنەمى جەتىلدىرىپ، الەمدىك وزەكتى ترەندتەرگە بايلانىستى باعدارلامانى جاڭا جوبالارمەن تولىقتىرىپ وتىرعانىن جەتكىزدى.
اۆتور: رۋسلان عابباسوۆ
