باس پروكۋراتۋرا قىزمەتكەرى مەن ءى ءى د تەرگەۋشىسى قاماۋعا الىندى

استانا. قازاقپارات - ق ر باس پروكۋراتۋراسىنىڭ قىزمەتكەرى ك. ن. راحمەتوۆ ۇستالدى، بۇل تۋرالى ۆەدومستۆونىڭ فەيسبۋكتەگى پاراقشاسىندا حابارلاندى.

«باس پروكۋراتۋرانىڭ ۆەدومستۆوارالىق تەرگەۋ-جەدەل توبى ق ر ق ك 412-بابى 2-تارماعى (كورىنەۋ كىناسىز ادامدى قىلمىستىق جاۋاپتىلىققا تارتۋ) جانە ق ك 274-بابى 2-تارماعى (كورىنەۋ جالعان اقپارات تاراتۋ) بويىنشا ءبىرقاتار ازاماتتاردىڭ شاعىمىمەن باس پروكۋراتۋرانىڭ قىزمەتكەرى ك. ن. راحمەتوۆ پەن الماتى قالالىق ءى ءى د تەرگەۋشىسى م. ا. رەشەتوۆكە قاتىستى ءبىرقاتار قىلمىستىق ءىستى تەرگەپ جاتىر»، - دەلىنگەن باس پروكۋراتۋرانىڭ حابارلاماسىندا.

سوتقا دەيىنگى تەرگەۋ ماتەريالدارىنا سايكەس راحمەتوۆ پەن رەشەتوۆ قۇقىق قورعاۋ جانە فيسكالدى ورگانداردىڭ قاتارداعى قىزمەتكەرلەرىنىڭ ارەكەتىندە قىلمىس قۇرامىنىڭ جوق ەكەندىگىن بىلە تۇرا، ولارعا قىلمىستىق توپقا قاتىسۋ، جالعان كاسىپكەرلىككە دەم بەرۋ جانە قىزمەتىن اسىرا پايدالانۋ قىلمىستارىن جاسادى دەپ كىنا تاققان.

باس پروكۋراتۋرانىڭ اقپاراتى بويىنشا، راحمەتوۆ پەن رەشەتوۆكە قاتىستى «قاماۋدا ۇستاۋ» بۇلتارتپاۋ شاراسى قاراستىرىلدى.