ارباداعى ءبيدى مەڭگەرگەن ءۇرجارلىق ونەرپازدار سانكت-پەتەربۋرگتى باعىندىردى - فوتو

استانا. قازاقپارات - رەسەيدىڭ سانكت- پەتەربۋرگ قالاسىندا ارباداعى ءبي سايىسىنان ءداستۇرلى «قۇرلىقتار كۋبوگى» اياقتالدى.

12 ەلدىڭ مۇمكىندىگى شەكتەۋلى ونەرپازدارى قاتىسقان حالىقارالىق جارىستا قازاقستاننىڭ نامىسىن قورعاعان ونەرپازدار جالپى كوماندالىق ەسەپتە ءۇشىنشى ورىندى يەلەندى، دەپ حابارلايدى «قازاقپارات» ح ا ا ءتىلشىسى.

شىعىس قازاقستان وبلىسىنىڭ ءۇرجار اۋدانىنىڭ تۋمالارى، قوس ونەرپاز باعلان مانابايەۆ پەن الىبەك تولەگەنوۆ بيىل عانا استانادا وتكەن رەسپۋبليكالىق دەڭگەيدەگى چەمپيوناتتان جۇلدەلى ورالعان بولاتىن.

سانكت-پەتەربۋرگتە 9-10- قىركۇيەك ارالىعىندا وتكەن كۋبوك جارىسىنا باعلان جانە الىبەكپەن بىرگە، ءۇرجار اۋداندىق الەۋمەتتىك-مەديتسينالىق ورتالىقتىڭ تاربيەلەنۋشىسى 11 جاستاعى الەكسەي جۋراۆليەۆ تە بارعان. باعلان مەن الىبەكتىڭ وسى ۋاقىتقا دەيىن دە حالىقارالىق سايىستاردا باقتارىن سىناعانىن ايتا كەتۋ كەرەك. ەكى جىل بۇرىن سانكت- پەتەربۋرگ قالاسىنداعى ون سەگىز مەملەكەتتىڭ ونەرپازدارىنىڭ قاتىسۋىمەن وتكەن كۋبوك جارىسىندا قوس ونەرپاز بەسىنشى ورىننان كورىنگەن بولاتىن.

ءۇرجارلىقتار بۇل جولى كورسەتكىشىن جاڭارتىپ وتىر. سانكت-پەتەربۋرگتە وتكەن «قۇرلىقتار كۋبوگىنا» ازەربايجان، بەلورۋسيا، بەلگيا، ۆەنگريا، يتاليا، يزرايل، قازاقستان، وڭتۇستىك كورەيا، سەربيا، سلوۆاكيا مەن فينليانديا ەلدەرىنىڭ اربادا وتىرىپ ءبيدى باعىندىرعان ونەر يەلەرى جينالعان.

8- قىركۇيەكتە سپورتشىلاردىڭ دايىندىعى سارالانىپ، ءبىر كۇننەن كەيىن سايىس باستالىپ كەتكەن. ەكى كۇندىك تارتىستى كۋبوك جارىسىندا 12 ەلدىڭ مىقتىلارى ەۋروپالىق، لاتىنامەريالىق جانە ۇلتتىق بيلەرى بويىنشا مەڭگەرگەن بيلەرىن كورسەتكەن.

بۇل جولعى سايىستىڭ ەرەكشەلىگى - وندا 10-16 جاس ارالىعىنداعى جاس وسپىرىمدەر اراسىندا جەكە كۋبوكتىڭ وتكىزىلۋى. اتالعان جارىستا قازاقستان اتىنان بارعان الەكسەي جۋراۆليەۆ جۇلدەلى ءبىرىنشى ورىندى يەلەنگەن.

ال بۇعان دەيىن دە توپ جارىپ جۇرگەن باعلان مانابايەۆ قولا مەدال يەلەنىپ، وتانداستارىمىزدىڭ جەتىستىگى جالپى ەسەپتە قازاقستاندى ءۇشىنشى ورىنعا كوتەرىپ وتىر. ءۇرجارلىق ونەرپازداردىڭ اربادا وتىرىپ ءبيدى باعىندىرۋىنا مۇرىندىق بولعان ءۇرجار الەۋمەتتىك-مەديتسينالىق مەكەمە ديرەكتورىنىڭ ورىنباسارى رىسقان جانكۇشىكوۆانىڭ ەڭبەگىن ەرەكشە اتاپ وتۋگە بولادى.

جاس ورەندەردى ورگە سۇيرەپ جۇرگەن رىسقان جانكۇشىكوۆا ونەرپازداردى سپورت ارباسىمەن قامتۋدا دەمەۋشىلەردى تارتىپ، جاستاردىڭ ونەرىن شىڭداپ كەلەدى.