تۇيمەبايەۆ: كادر تاپشىلىعىن جويۋ ءۇشىن تۇرعىن ءۇي ماسەلەسىن شەشۋىمىز قاجەت

استانا. قازاقپارات - وبلىستا كادر تاپشىلىعىن شەشۋ ءۇشىن ءاربىر اۋدان، قالاداعى ەلدىمەكەننەن قىزمەتتىك تۇرعىن ءۇي سالۋ قاجەت. بۇل تۋرالى بۇگىن وڭتۇستىك قازاقستان وبلىسىنىڭ اكىمى ج. تۇيمەبايەۆ سەلەكتورلىق جيىندا ايتىپ، ءتيىستى سالا باسشىلارىنا تەز ارادا قولعا الۋدى تاپسىردى.

اۋدان، قالا اكىمدەرى مەن باسقارما باسشىلارىنىڭ قاتىسۋىمەن وتكەن ماجىلىستە شالعاي ەلدى مەكەندەردە ءومىر ءسۇرىپ، مەملەكەتتىك جانە بيۋدجەتتىك سالادا ورىن الاتىن كادر جەتىسپەۋشىلىگى ماسەلەسى مەن ونىڭ شەشۋ جولدارى قارالدى.

 ساپالى كادر دايىنداۋ زامان تالابى ەكەنىن ايتقان ايماق باسشىسى ءاربىر قىزمەتكەرگە بارىنشا جاعداي جاساۋ قاجەتتىگىن جەتكىزدى.

 «بىلىكتى كادردى جۇمىسقا الۋ ءۇشىن وعان، ەڭ الدىمەن، ءۇي ماسەلەسىن شەشىپ بەرۋىمىز كەرەك. سوندىقتان، وڭتۇستىكتەگى ءاربىر اۋىلدىق وكرۋگتەن 20 پاتەرلى ەكى قاباتتى، ال اۋدان ورتالىعىنان 30-40 پاتەرلى كوپقاباتتى تيپتىك ۇلگىدەگى تۇرعىن ءۇي سالۋدى بيىلعى جىلدان قالماي قولعا الۋدى قۇرىلىس باسقارماسىنا تاپسىرامىن. وسى ارقىلى ءبىز مامان تاپشىلىعىن جويىپ، ساپالى كادرعا قول جەتكىزەمىز دەپ ويلايمىن. مۇنان بولەك، جۇمىستىڭ ساپاسىن ارتتىرىپ، بىلىكتى كادرلار دايىنداۋ ءۇشىن روتاتسيالاۋ تەتىگى ارقىلى وبلىس بويىنشا مامانداردى وزگە اۋداندارعا جۇمىسقا جىبەرۋ ءتيىمدى ءادىس بولىپ تابىلادى»، - دەدى اكىم.

سونىمەن قاتار، ءوڭىر باسشىسى تۇرعىن ءۇي سالۋ ارقىلى اۋدان اكىمدەرىنىڭ ينديكاتورلىق كورسەتكىشىن باعالايتىنىندا اتاپ ءوتتى.

جيىندا ءسوز العان وبلىستىق ءبىلىم باسقارماسىنىڭ باسشىسى يساتاي ساعىندىقوۆ وڭىردەگى 15 اۋدان، قالا اكىمدىكتەرىنەن جانە سالالىق باسقارمالاردان 87 ماماندىق بويىنشا 14374 ورىنعا سۇرانىس كەلىپ تۇسكەنىن ءمالىم ەتتى.

 «جاس مامانداردىڭ كوپتەپ اۋىلدارعا ورالۋى، مەملەكەت تاراپىنان ىسكە اسىرىلىپ جاتقان «جاستار پراكتيكاسى» مەن «ديپلوممەن اۋىلعا» باعدارلامالارىنىڭ ناتيجەسىندە اۋىلدىق جەرلەردە كادر جەتىسپەۋشىلىگى وڭ شەشىمىن تابۋدا دەسەك تە بولادى. الايدا شالعاي جەرلەردە ورنالاسقان مەكتەپتەردەگى مامان تاپشىلىعى ءالى دە وتكىر ماسەلەلەردىڭ قاتارىندا. ماسەلەن، وقۋ جۇكتەمەسىنىڭ از بولۋى، تۇرعىن ءۇي ماسەلەسىنىڭ شەشىلمەۋىنە بايلانىستى پەداگوگتار اۋىلدارعا بارعىلارى كەلمەيدى»، - دەدى باسقارما باسشىسى.

 ال دەنساۋلىق ساقتاۋ سالاسىنداعى مامان تاپشىلىعى مەن تۇرعىن ۇيمەن قامتۋ ماسەلەسى ايقىن. ماسەلەن، باسقارما باسشىسى مۇقان ەگىزبايەۆتىڭ مالىمەتىنشە، 2007-2016 -جىلدار ارالىعىندا دەنساۋلىق ساقتاۋ باسقارماسى 1085 جاس ماماندى اۋىلدىق جەرلەرگە جۇمىسقا ورنالاستىرسا، اۋىل اكىمشىلىگى تاراپىنان 293 جاس مامان تۇرعىن ۇيمەن قامتىلعان. ال ءدال قازىرگى تاڭدا دەنساۋلىق ساقتاۋ باسقارماسىنا قاراستى مەديتسينالىق ۇيىمداردا جالپى 265 مامان، ونىڭ ىشىندە 157 مامان اۋىلدى جەرگە قاجەت. سونداي- اق، وبلىستىڭ باس دارىگەرى اۋىلدى جەرلەردە جۇمىس اتقارىپ وتىرعان 180 مامان تۇرعىن ۇيگە مۇقتاج ەكەنىن ايتىپ، دەسە دە مەملەكەتتەن جاس ماماندارعا ءبىرشاما قولداۋ كومەك بەرىلىپ جاتقانىن مالىمدەدى.

 «جاس ماماندارعا وبلىستىق بيۋدجەتتەن 100 مىڭ تەڭگە مولشەرىندە اقشالاي وتەماقىلار مەن تولەمدەر تولەنىپ كەلگەن. ەندى، اۋىلدىق جەرگە جولداناتىن ءار مامانعا ءبىر رەتتىك 1 ميلليون تەڭگە تولەنەدى جانە 5 جىل ىشىندە قايتىپ كەتكەن جاعدايدا جاس مامان بيۋدجەتكە قايتارۋ كەرەك بولادى. مۇنداي تىڭ جوبا ەلىمىز بويىنشا وڭتۇستىك قازاقستاندا العاش بولىپ جۇزەگە اسىرىلىپ وتىر»، - دەدى م. ەگىزبايەۆ.

وسى رەتتە، وبلىس اكىمىنىڭ ەلدى مەكەندەردە كوپ قاباتتى تۇرعىن ءۇي سالۋ يدەياسى جوعارىدا ايتىلعان ماسەلەلەردىڭ رەت- رەتىمەن شەشىلۋىنە مۇرىندىق بولارى ءسوزسىز.

سەلەكتورلىق جيىننىڭ كۇن تارتىبىندە قارالعان كەزەكتى تاقىرىپ - جەرگىلىكتى اتقارۋشى ورگاندار قىزمەتىنىڭ تيىمدىلىگىن باعالاۋ ناتيجەلەرى بولدى. وندا اكىم بارشا مەملەكەتتىك قىزمەتكەرلەر مەن اۋدان، قالا اكىمدەرىنە جانە باسقارما باسشىلارىنا ادەپ نورمالارىن ساقتاۋدى باسشىلىقتان باستاۋدى تاپسىردى.