ليموننىڭ قاۋقارى نەگە جەتەدى؟

نۇر-سۇلتان. قازاقپارات - وتكەن جولى ليمون ەفير مايىن سۋعا تامىزىپ، قىسقاتولقىندى پەشكە سالىپ قويسا، جاعىمسىز يىستەن ارىلتاتىنىن جازعان ەدىك. بۇگىن ەفير مايىن ىزدەپ الەك بولماي- اق، قاراپايىم ليموندى تۇرمىستا پايداعا جاراتۋعا ارنالعان كەڭەستەر ۇسىنامىز.

ليموننىڭ قابىعىن اشىپ، وسى قابىعىن ىدىسقا سالىپ، ۇستىنە سۋ قۇيىپ، ميكروتولقىندى پەشكە بەس مينۋتقا سالىپ، قىزدىرىڭىز. سودان سوڭ پەشتىڭ ءىشىن سۇرتسەڭىز، جىلان جالاعانداي جىلتىراپ شىعا كەلەدى.

قايناعان قىزىلشانى تۋراعاننان كەيىن ونىڭ قولعا ءسىڭىپ قالعان قىزىل بوياۋى وڭايلىقپەن كەتپەيدى. سۋمەن، سابىنمەن قانشا جۋساڭىز دا كەتىرە الماي قويدىڭىز با؟ وندا الدىمەن ليموندى كەسىپ، قولىڭىزعا جاعىڭىز. سودان سوڭ جۋساڭىز، تاپ- تازا بولعان قولىڭىزعا قاراپ، قىزىلشا ۇستاعانىڭىزدى دا ۇمىتىپ كەتەسىز.

قول- اياعىڭىزدىڭ تەرىسى قۇرعاپ، اسىرەسە شىنتاعىڭىز قاتپارلانىپ تۇرا ما؟ ونىڭ دا شەشىمىن ليمون ارقىلى تاباسىز. ءبىر ليموننىڭ شىرىنىن سىعىپ، ۇستىنە ءبىر قاسىق اس سوداسىن سالىڭىز. وسى قوسىندىعا ماقتا مالىپ الىپ، قۇرعاعان جەردى ءسۇرتىڭىز. ەندى بۇل دا ماسەلە بولمايدى.

الما، المۇرت سەكىلدى جەمىستەردى ەرتە تۋراپ قويساق، بەتى قۇرعاپ قالادى. قارايىپ كەتپەۋى ءۇشىن بەتىنە ازداپ قانا ليمون سىعىندىسىن سەبىڭىز.

شاشىڭىزدى باسقا تۇسكە بويادىڭىز با؟ جۋعان سايىن بوياۋ سۋمەن اعىپ، شاشىڭىز باستاپقى تۇسىنە ۇقساپ كەتۋى مۇمكىن. بۇل ماسەلەنىڭ الدىن الۋ ءۇشىن شاشىڭىزدى جۋار الدىندا ليمون شىرىنىن جاعىڭىز.

تىرناعىڭىز جۇمساق، سىنعىش پا؟ سۋعا ليمون شىرىنىن جانە ءوزىن سالىپ، بىرنەشە مينۋت ساۋساعىڭىزدى مالىپ وتىرساڭىز، تىرناقتى قاتايتىپ، جاقسى قالىپقا كەلتىرەدى.

Massaget.kz