جاڭا ءالىپبي ماسەلەسىندە ەشقانداي قاتەلىك بولماۋى كەرەك - نىعماتۋلين
بۇل تۋرالى پارلامەنت ءماجىلىسىنىڭ ءتوراعاسى نۇرلان نىعماتۋلين ءمالىم ەتتى، دەپ حابارلايدى قازاقپارات.
«بارشاڭىزعا ءمالىم، قازىرگى ۋاقىت ول بۇكىل الەمدە اقپارات تەحنولوگيالارىنىڭ جوعارى دەڭگەيدە دامۋىنىڭ كەزەڭى. سوندىقتان ءبىزدىڭ مەملەكەتىمىزدە زامانعا ساي «سيفرلىق قازاقستان» باعدارلاماسى جۇزەگە اسىرىلىپ جاتىر. ەلباسىمىزدىڭ تاپسىرماسىنا سايكەس، بارلىق بىلىكتى ماماندار بىرنەشە جىلدىڭ ىشىندە لاتىن قارپى بويىنشا قازاق ءالىپبيىنىڭ جاڭا جوباسىن جاسادى. ەڭ باستىسى - جاڭا ءالىپبي بارلىق تالاپتارعا ساي بولسا، ءبىز بيىك تەحنولوگيالاردى مەڭگەرۋگە، ينتەرنەتكە، عىلىم مەن بىلىمگە جانە الەمدىك دامۋعا ەركىن كىرەتىن بولامىز. بۇل بولاشاق ۇرپاق الدىنداعى ءبىزدىڭ ۇلكەن پارىز جانە ولارعا قالدىراتىن ماڭگىلىك مۇرا. سوندىقتان لاتىن جازۋىنا كوشۋ - زور مۇمكىندىك پەن وتە ۇلكەن جاۋاپكەرشىلىك. سول ءۇشىن ءبىزدىڭ ءۇشىنشى سەسسياداعى العاشقى پارلامەنتتىك تىڭداۋ دا ەلباسىنىڭ تاريحي باستاماسىنا ارنالىپ وتىر»، - دەدى ءماجىلىس ءتوراعاسى «مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرى تۋرالى» پارلامەنتتىك تىڭداۋدا.
وسى ورايدا ن. نىعماتۋلين پارلامەنتتىك تىڭداۋعا جاڭا ءالىپبيدى جاساعان اۆتورلار ارنايى شاقىرتىلعانىن، سونداي-اق ولار بۇل جوبا تانىستىرىلاتىنىن اتاپ ءوتتى.
«بۇگىن ءبىز جاڭا ءالىپبيدى جان-جاقتى تالقىلاپ، ءاربىر ءارىپتى، ءار تاڭبا مەن بەلگىنى تەرەڭ تالداۋىمىز قاجەت. سەبەبى ءتىل، جاڭا ءالىپبي ماسەلەسىندە ەشقانداي قاتەلىك بولماۋى كەرەك»، - دەپ تۇيىندەدى ءسوزىن ول.
ايتا كەتەيىك، پارلامەنتتىك تىڭداۋدا جاڭا ءالىپبي نۇسقاسى نەگىزىندە ش. شاياحمەتوۆ اتىنداعى رەسپۋبليكالىق ورتالىق قىزمەتكەرلەرى جانە سىرتتان شاقىرىلعان تۇرعىندار اراسىندا بىرنەشە رەت اپروباتسيا جۇرگىزىلگەنىن ايتىلدى. بۇل جايىندا اتالعان ورتالىقتىڭ ديرەكتورى ەربول تىلەشوۆ بايانداپ بەردى.
