پارلامەنت ءتوراعاسى: جاڭا ءالىپبي بۇكىل الەم قازاقتارىن بىرىكتىرەتىن وتە ماڭىزدى فاكتور

استانا. قازاقپارات - ءتىلدىڭ حالىقارالىق مارتەبەسىن كوتەرۋ - ءبىزدىڭ الەمدىك وركەنيەتكە جەتۋىمىزدىڭ باستى كەپىلى.

بۇگىن پارلامەنت ءماجىلىسىنىڭ ءتوراعاسى نۇرلان نىعماتۋلين «مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرى تۋرالى» پارلامەنتتىك تىڭداۋدا وسىلاي ءمالىم ەتتى، دەپ حابارلايدى قازاقپارات.

«بۇگىن ءبىز مەملەكەتىمىز ءۇشىن، حالقىمىز ءۇشىن تاريحي ماڭىزى زور جاڭا ءالىپبي ماسەلەسىن تالقىلايتىن بولامىز. الەمدىك تاجىريبە بويىنشا وركەنيكە، مادەنيەتكە جانە عىلىمعا جول سالعان كەز كەلگەن مەملەكەت ەڭ الدىمەن ءتىلدىڭ دامۋىنا ەرەكشە كوڭىل بولەدى. وسى جولدا ەلباسىمىز نۇرسۇلتان ءابىش ۇلى نازاربايەۆ تاۋەلسىزدىك العان كۇننەن باستاپ قازاق ءتىلىن كوتەرۋگە نازار اۋداردى. سونىڭ ناتيجەسىندە بۇگىنگى كۇنى قازاق تىلىندە ءبىلىم بەرەتىن مەكتەپتەردىڭ سانى جەتپىز پايىزعا جەتتى. ال 2025 -جىلعا قاراي قازاقستاندىقتاردىڭ 95 پايىزى قازاق تىلىندە سويلەيتىن بولادى. وسىنىڭ بارلىعى، سونىڭ ىشىندە لاتىن ارپىنە كوشۋ - ءتىلىمىزدىڭ مارتەبەسىن كۇشەيتۋ جولىنداعى ناقتى قادامدار»، - دەدى ءماجىلىس ءتوراعاسى.

وسى ورايدا ن. نىعماتۋلين وتكەن جيىرما بەس جىلدىڭ ىشىندە ەكونوميكامىز ءوسىپ، ساياساتىمىز ورنىقتى بولىپ، حالقىمىزدىڭ جاعدايى جاقسارعانىن، ەگەمەن ەلىمىز بۇكىل دۇنيەجۇزىنە تانىمال بولىپ، «ماڭگىلىك ەل» بولۋدىڭ دارا جولىنا تۇسكەنىن قاداپ ايتتى.

«ءدال وسى كەزەڭدە ەلباسىمىز ەڭ الدىمەن رۋحاني جاڭعىرۋ مىندەتىن قويىپ وتىر. سونىڭ ىشىندە جاڭا الىپبيگە كوشۋ - ول وتە ماڭىزدى ماسەلە. ءبىزدىڭ ۇلتتىق سانا- سەزىم، رۋحاني دامۋ، وركەندەۋ جولىمىز، وسىنىڭ بارلىعى قازاق ءتىلىنىڭ جاڭا ءالىپبيىن جاساۋدان باستالادى. سەبەبى مەملەكەت باسشىسى ايتقانداي، قازاق ءتىلى ءبىزدىڭ رۋحاني نەگىزىمىز. وسى جولدا ءتىلدىڭ حالىقارالىق مارتەبەسىن كوتەرۋ - ءبىزدىڭ الەمدىك وركەنيەتكە جەتۋىمىزدىڭ باستى كەپىلى. سونىمەن بىرگە جاڭا ءالىپبي بۇكىل الەم قازاقتارىن بىرىكتىرەتىن وتە ماڭىزدى فاكتور»، - دەدى ول.