ەكسپو تۋى حالىقارالىق كورمەلەر بيۋروسىنا تاپسىرىلدى

استانا. قازاقپارات - «ەكسپو» كورمەسىنىڭ تۋى سالتاناتتى تۇردە حالىقارالىق كورمەلەر بيۋروسى باس اسسامبلەياسىنىڭ پرەزيدەنتى ستين كريستەنسەنگە تابىستالدى، دەپ حابارلايدى «قازاقپارات» ح ا ا ءتىلشىسى.

كورمە تۋىن قادىرلى قوناققا كورمەنىڭ جابىلۋ سالتاناتىنىڭ قۇرمەتىنە وراي ۇيىمداستىرىلعان شوۋدان كەيىن «استانا ەكسپو-2017» ۇ ك» ا ق باسقارما ءتوراعاسى احمەتجان ەسىموۆ تاپسىردى.

ايتا كەتەرلىگى، حالىقارالىق كورمەلەر بيۋروسىنىڭ تۋى قازاقستاندا 90 كۇن بويى ساقتالعان بولاتىن. ءوز كەزەگىندە حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەس ۆيدەو ارقىلى وسىنداي اۋقىمداعى شارانى ابىرويلى وتكىزگەنى ءۇشىن قازاقستان باسشىلىعى مەن حالقىنا زور العىسىن ءبىلدىردى.

كورمەنىڭ جابىلۋ سالتاناتىنا وراي وتكىزىلگەن شوۋدا ايتىلعانىنداي، كورمە وتكىزىلگەن 3 اي ۋاقىتتا 33 مىڭ ءارتىس استانادا ونەر كورسەتىپ، كورمەگە 180 ەلدىڭ مەيماندارى كەلىپ قايتقان. 4,5 مىڭ ەرىكتى ەڭبەك ەتىپ، قوناقتار 100 ميلليون فوتوسۋرەت تۇسىرگەن. كورمە اۋماعىندا 88 ۇسىنىس جاسالىپ، جاس وتباسىلار جاڭا ءومىر باستاعان. ءوز كەزەگىندە عالىمدار 153 ونەر تۋىندىسىن تانىستىرعان.

اۆتور: ايان بەكەن ۇلى