نۇرسۇلتان نازاربايەۆ مۇسىلماندار اراسىندا نوبەل سىيلىعى يەگەرىنىڭ سانىن ارتتىرۋدى ۇسىندى
بۇل تۋرالى بۇگىن ەلوردا تورىندە باستالعان يسلام ىنتىماقتاستىق ۇيىمىنىڭ عىلىم جانە تەحنولوگيالار جونىندەگى ءبىرىنشى سامميتىندە قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات.
«يسلام بۇگىندە قارقىندى دامىپ كەلە جاتقان ءدىن. 21- عاسىردا ول الەمدەگى ەڭ كوپ تاراعان دىنگە اينالادى. پايعامبار حاديسىندە «بەسىكتەن قابىرگە دەيىن ءبىلىم ىزدەڭدەر» دەپ ايتىلعان. ءبىزدىڭ باستى مىندەتىمىز - يسلام وركەنيەتىنە قىزمەت ەتەتىن، جاڭا يدەيالاردى جۇزەگە اسىراتىن ينتەلەكتۋالدى جاڭا ەليتانى تاربيەلەۋ»، - دەدى نۇرسۇلتان نازاربايەۆ.
قازاقستان پرەزيدەنتى الايدا مۇسىلمان مەملەكەتتەرى عىلىمي زەرتتەۋلەر مەن ازىرلەمەلەرگە ورتاشا العاندا جالپى ىشكى ءونىمنىڭ جارتى پروتسەنتىن عانا بولەتىندىگىن، ول 2,3 پروتسەنتتى قۇرايتىن الەمدىك كورسەتكىشتەن الدەقايدا تومەن ەكەندىگىن اتاپ ءوتتى.
«قوعامداستىق مەملەكەتتەرىندە 1 ميلليون تۇرعىنعا شاققاندا زەرتتەۋشىلەردىڭ سانى 615 ادام بولادى. ول الەمدىك ورتاشا كورسەتكىشتەن 2,5 ەسە از. يسلام الەمىندە عىلىم بويىنشا نوبەل سىيلىعىنىڭ تەك قانا 2 لاۋرەاتى بار. ولار: پاكىستان فيزيگى موحاممەد ابدۋس سالام - 1979-جىلى، مىسىر حيميگى احمەد حاسان زيەۆەيل - 1999-جىلى. وسى جاعدايدى كۇرت وزگەرتۋىمىز كەرەك»، - دەدى ەلباسى.
