ەردوعان قازاقستانعا جاساعان العاشقى ساپارىن ەسكە الدى

استانا. قازاقپارات - اقوردادا ق ر پرەزيدەنتى نۇرسۇلتان نازاربايەۆ پەن تۇركيا رەسپۋبليكاسىنىڭ باسشىسى رەدجەپ تايىپ ەردوعان ەكىجاقتى كەزدەسۋ وتكىزدى.

سول كەزدە ەردوعان قازاق جەرىنە جاساعان العاشقى ساپارىن ەسكە الدى، دەپ حابارلايدى قازاقپارات ءتىلشىسى.

«قازاقستان مەن تۇركيا اراسىنداعى قارىم- قاتىناستاردىڭ 25 جىلدىعى اياسىندا رەسمي ساپارمەن كەلىپ وتىرعانىما وتە قۋانىشتىمىن. مەن ءوزىم قازاقستاندى العاش رەت الماتى قالاسى ارقىلى تانىعان ەدىم. سودان بەرى كوپ نارسە وزگەردى. استانا قۇرىلدى. بۇل - ءبىزدىڭ ەكىنشى ءۇيىمىز. قازاقستانعا كەلسەك، ءوز ۇيىمىزدە جۇرگەندەي بولىپ سەزىنەمىز»، - دەدى رەدجەپ تايىپ ەردوعان.

تۇركيا باسشىسىنىڭ ايتۋىنشا، بۇگىندە قازاقستان مەن تۇركيا ەكونوميكا، مادەنيەت، ساياسات، اسكەري سالا جانە باسقا دا باعىتتاردا تىعىز قارىم- قاتىناستاردى دامىتىپ كەلەدى. ەكى ەلدىڭ ساۋدا اينالىمى 2 ميلليارد دوللاردىڭ شاماسىندا. «ارينە، بۇل كورسەتكىش ءبىز ءۇشىن جەتكىلىكسىز. بۇرىن كەلىسكەندەي، ساۋدا- ساتتىقتى 5 ميللياردقا جەتكىزۋىمىز كەرەك. ول ءۇشىن ەكونوميكالىق مۇمكىندىگىمىز بار»، - دەپ اتاپ كورسەتتى ەردوعان.

ايتا كەتەيىك، تۇركيا پرەزيدەنتى قازاقستانعا ايماقتىق ماسەلەلەردى، سيريا ماسەلەسىن رەتتەۋ سالاسىنداعى جۇمىستارى ءۇشىن ءوز العىسىن جەتكىزدى.